Qernertanik qilalugarniarneq unitsinneqartoq ammaqqinneqarpoq
Taama aalajangiusserpalutsigisumik nalunaaruteqarneq pisanik nalunaarsuinermik kinguneqarsimagunarpoq ingamik Kangaatsiami Ilulissani Qasigiannguanilu.
Piniarnermut naalakkersuisoqarfik maanna nalunaaruteqarpoq aqutsiveqarfinni Kangaatsiami Ilulissani Qasigiannguanilu qilalukkat qernertat pisarineqarnerinut nalunaarsukkat eqqortut pissarsiarisimallugit, taamaattumillu aqutsiveqarfinni pineqartuni qilalukkanik qernertanik piniartoqarsinnaanngortoq.
Aqutsiveqarfinni Aasianni Uummannami Qeqertarsuarmilu pisaasimasunik eqqortunik nalunaaruteqartoqartanngimmat pineqartuni qilalukkanik qernertarniartoqassanngitsoq piniarnermut Naalakersuisoqarfik nalunaarpoq. Aqutsiveqarfinni Aasianni Uummannami Qeqertarsuarmilu eqqortumik nalunaartoqartalerpat piniarsinnaaleqqinneq ilisimatitsissutigineqarumaartoq piniarnermut naalakkersuisoqarfik nalunaarpoq.
Qilalukkanik qaqortanik qernertanillu illersuineq piniarnerlu pillugit Namminersorlutik Oqartussat nalunaarutaat naapertorlugu pisat, saniatigut pisat pissassallu sapinngisamik piaarnerpaamik pisanik immikkut nalunaartussaatitaanermi immersugassaq atorlugu nalunaarutigineqassapput.
Naalakkersuisoqarfimmit erseqqissaatigineqassaaq pisassiissutigineqartut kommunimit qularnaatsumik akisussaaffigineqartussaammata, pisassiissutigineqartut aamma sipporneqannginnissaat akisussaaffigineqarmat, tamakkerneqarpatalu piniarneq piaartumik unitsinneqassammat.