Qeriuaannartup aakkiartornera mittarfinnut ajoqutaasinnaavoq
Nuna qeriuaannartoq silaannaallu allanngoriartornera pillugu ilisimatooq Vladimir Romanovsky oqarpoq. Nuuk Climate Days-imi Katuami ingerlanneqartumi ilisimatusartunut naalakkersuinermillu sulialinnut taanna ippassaq oqalugiarpoq.
- Kiannerulerpoq qeriuaannartorlu aakkiartormat tamanna uumasunut, nunamut atortulersuuteqarnermullu kingunerlorataannaavoq.
Nuna qeriuaannartoq silaannaallu allanngoriartornera pillugu ilisimatooq, Vladimir Romanovsky, ippassaq ilisimatusaqatiminut Nuuk Climate days-imi oqalugiarnermini taama erseqqitsigisumik oqariartuuteqarpoq. Nunanili issittormiuni sanilitsinnut sanilliulluta ajornerusumik inissisimanngilagut.
- Alaskamut sanilliulluta tamatuma kinguneri ajornerussanngillat, tassami sanaartukkat amerlanerit qaarsup qaani sanaajupput.
Mittarfiilli eqqarsaatigalugit nunap qeriuaannartup aakkiartornera kingunerlussinnaavoq. Toqqissumik sanaat qeriuaannartup aakkiartorneranit sunnerneqarnerusinnaasut ilisimatooq nassuiaavoq.
- Annertunerusumik qanoq iliortoqarsinnaanngilaq taamaallaallu iluarsaatiinnagassaasassallutik. Nunalli qeriuaannartuunera qajannarluinnartuuvoq ukiullu qulikkuutaat hundredelikkuutaalluunniit ingerlaneranni kingunera aatsaat iluamik paasinarsisinnaassalluni.
Silaannaq kissakkiartuinnassappat nuna qeriuaannartoq aakkumaartoq Vladimir Romanovsky oqarpoq. Maannali aakkiartorneraniippugut tassalu ajornartorsiulerfiusinnaasumiilluta, taanna naggasiivoq.
Nuna qeriuaannartoq silaannaallu allanngoriartornera pillugu ilisimatooq, Vladimir Romanovsky, radioaviisimi suleqatitsinnut Katja Nyborgimut taama oqarpoq. Silaannaq pillugu ilisimatusartut 170-it missaanniittut Nuuk Climate Days-imi ataatsimeeqataasut aqagu naggammik ataatsimiissapput.
Nalunaaquttap akunnerata affaa qaangiuppat Katja Nyborgip aallakaatitassiaa "Nunarput allanngulerpoq" KNR-TV-imi aallakaatinneqassaaq tassanilu silaannaap allanngoriartornera sammineqassalluni. Tassa qallunaatuua unnugu nal. 19.30 aallakaatinneqassaaq kalaallisuunngortinneralu aqagu nal.19.55 aallakaatinneqassalluni.
