Qeqqata kommunissaani suleqatigiissutissaqaqaat

- Suu, tassa anguniakkagut assigiinngitsut immitsinnut qanillatoorsinnaallugit paaseqatigiippugut. Aamma isumaqatigiippugut ingerlatsinissarput kommunerujussuarmi kivitsinissamut qulit tunuliaqutarissallugit tulluartut. Quliulluta borgmesterinngortitsinermi, borgmesterillu tullissaanik toqqaanissami ataatsimiititalianilu inuttalersuinissami aamma ikioqatigiittussaassaagut, oqarpoq.

Qeqqata kommuneani Hermann Berthelsen borgmesterinngorpat tullersortigissavaa Siumukkormioqatini Maniitsumeersoq Karl Lyberth. Borgmesterip tulliata tullerissavaa Atassummeersoq Søren Alaufesen. Sulili qulakkiivinneqanngilaq. IA-kkut Demokraatillu tallimanik issiatitaqartut allamik toqqaasinnaapput, taamaassappallu makitsisoqartariaqarumaarpoq.

- Tassa kommunalbestyrelsemi nutaami 15-inik ilaasortaqartussaavoq, taamaalilluta Atassut Siumullu katilluta quliusussaavugut. Isumaqatigiissutigivagut suliniutissat assigiinngitsut ulluni tulliuttuni suliarineqassasut, partiitta immikkoortortai suleqatigilluinnaqqissaarlugit. Taavalu ukiumut tulliuttumut qinigaaffiit iluanni anguniagassat assigiinngitsut aamma piareersarneqarumaarput.

Piareersagassanut ilaalluinnarput, Sisimiuni erngup nukissiorfiliaq Maniitsullu eqqaaniissagunavissoq aluminiumik aatsitsivissaq. Pilersaarusiornerillu aallartereerput.

- Taamaattussaavoq siunissamik takorluuisariaqarpugut. Kommunerujussuup inoqarfigisat tamarmik ineriartortinnissaannut. Suliffeqarfissualiornissat pinngitsooratik ineriartornissami iluaqutaasorujussuussapput. Neriuppugullu aamma iluatsikkumaartut innuttaasunullu artukkiinatik, kisianni iluaqutissartai annertunerujumaartut, borgmester Hermann Berthelsen oqarpoq.

Tullersortissaata Karl Lyberthip Maniitsumit qanittukkut oqaatigaa meeqqeriviit akeerutsittariaqartut. Taannali aappaagumut aningaasat missingersuusiorneranni aatsaat oqaluuserineqarsinnaasoq Hermann Berthelsenip erseqqissaatigaa.