Qeqqata Kommuniani inissiat akii qaffaavigineqalerput

Kommunalbestyrelsi kingullermik ataatsimiimmat, tassa septembarip ulluisa 29-anni, Inissiaatileqatigiiffiup A/S INI-p 2012-imut missingersuutai ullormut oqaluuserisassanut ilaapput. INI-p kommunillu allaffissornermut aqutsisoqarfiata siunnersuutigaat inigisamut akit ima akitsorneqassasut:

Maniitsumi pigisaanilu ilaqutariit arlallit inigisaasa akii procentinik marlunnik qaffanneqassasut, ilaqutariit ataatsit- marlullu inigisaannut akit procentinik pingasunik qaffallutik.

Allaffissornermut pisortaqarfimmiit tikkuarneqarpoq ilaqutariit ataatsit- marlullu inigisaasa aserfallatsaalinissaannut aningaasaliinissaq ukiut arlallit qaangiuppata pisariaqalissagaluarpat, inigisanut akiliutit qaffanneqaqqissinnaassasut, imaluunniit inigisat atorunnaarsinneqarsinnaallutik.

Kommunalbestyrelsip siunnersuutaa tusaatissatut tiguneqarpoq.