Nalunnguarfiup Atuarfiani angajullerni atuartut ulluni makkunani misilitseqattaarput suleqatigiiaarlutillu suliaqartarlutik.Assi: KNR

Qeqqata kommuniani atuartut sinniisai: Atuanngitsoortoqaraangat suleqatigiinneq pikkunaallisarpoq

Nalunaaruteqaratik atuariartunngitsoortartut amerlavallaalermata, Qeqqata Kommunia sukaterivoq. Iluarunartittorujussuuara, Sisimiuni Nalunnguarfiup Atuarfiani angajullerni aqutsisoq oqarpoq.

Sisimiuni Nalunnguarfiup Atuarfiani angajullerni atuartut atuarneranni issiaviit ilaat inoqanngitsuukulasarput. Tamannalu allanngortinniarlugu, Qeqqata Kommunia iliuuseqarpoq.

Qeqqatami Kommuniani atuarfiit atuartutik napparsimallutik nalunaaruteqartigatik atuartitsinerup aallartinnerani takkutinngikkaangata angajoqqaat ilisimatittalerniarpaat.

- Uanga iluarunartittorujussuuvara, ajorinngiivippara klassemi nakkutilliisutut. Atuartorlu taanna takkutinngitsoorpat paasiniaavigissallugu angajoqqaaq: ”naak atuartuutersi?”, Nalunnguarfiup Atuarfiani angajullerni immikkoortortami aqutsisoq Anna Mâliánguak Sandgreen oqarpoq.

Angajullerni atuartut ulluni makkunani misilitseqattaarput suleqatigiiaarlutillu suliaqartarlutik.

- Amerlasuut takkutinngitsooraangata taava soorlu gruppetut suleqatigiinnerit allallu soorlu suleqatigiinnissaralugit amigalerlutillu pikkunaallisarput, taava sulineq annikinnerulerluni, atuartut sinniisaanut ilaasortaq Kimmernaq Støvlbæk oqarpoq.

Qeqqata Kommuniani meeqqat atuarfiini pitsaassutsimut nalunaarusiaq 2018/2019-imut tunngasoq naapertorlugu, atuartut angajulliit akornanni akuerisaanngitsumik atuanngitsoortarneq qaffasippoq. Nalunnguarfiup Atuarfiani akuerisaanngitsumik atuanngitsoorneq 9. klasseni 6,87 procentiusoq 10. klassini 9,71 procentiuvoq.

AAMMA ATUARUK Atuarfimmiit qimaaguit atuarfik angajoqqaannut oqaatiginnissaaq

- Peqquteqaratik atuanngitsoortuaannartut tassa amerlasoorujussuupput ajoraluartumik. Atuanngitsoortarnerup kingunerilertaramiuk inaarutaasumik misilitsinnissamut katataajartuaarneq, tassa ilisimasassaraluatik pinngitsoortaramikkit piffissaq taanna, Anna Mâliánguak Sandgreen oqarpoq.

Siusinaartumik iliuuseqarneq

Kommunilumi iliuuseqarpoq. Atuartoq takkutinngitsoorpat angajoqqaat pinngitsooratik nalunaartussaatitaasalernerat atulersinneqarpoq, nalunaartoqanngippallu atuarfik angajoqqaanut saaffiginnittalissaaq, ullummi atuanngitsoorfigineqartartut amerlavallaarsorineqarput.

Siusinaartumik iliuuseqartoqassasoq, Qeqqata Kommuniani Ilinniartitaanermut, Peqqinnermut, Sunngiffimmi sammisanut Kultureqarnermullu ataatsimiititaliap siulittaasua Evelyn Frederiksen (S) isumaqarpoq.

- Soorlu 5 procentiuppat, assigaa ullut qulit atuarsimanngitsoq, taannalu iliuuseqarfigisariaqarpoq pinngitsoorani. Nalunaarsimanngippat, paasiniartariaqarparput sooruna atuarsimanngitsoq, Evelyn Frederiksen oqarpoq.

Malittarisassat massakkit atuuttut naapertorlugit Nalunnguarfiup Atuarfiani atuartoq nalunaaruteqarani ullut pingasut atuarsimanngikkaangat aatsaat agajoqqaat saaffigineqartarput. Maannakkulli sukaterisoqarnerani ullormi atuanngitsoorfiusumi paasiniaavigineqartalissaaq.

Sukaterineq iluaqutaassaaq

Tamannalu iluaqutaassasoq, Kimmernaq Støvlbæk isumaqarpoq:

- Eqqumaffiginerulissavaat angajoqqaat meerartik atuanngitsoortoq, taava immaqa eqqarsalissapput; ”peqquteqarnaniuna atuanngitsoortoq”, taamak oqaannarsinnaannginnamik, taava immaqa atuarnerminut takkuttuaannarnerulissaaq ... immaqa, Kimmernaq Støvlbæk oqarpoq.

Sisimiuni Maniitsumilu atuarfinni atuartut atuanngitsoortartut klassimi procentinngorlugit 14,48 pricentiupput. Taamaammat sukaterineq iluaqutaanissaa Ilinniartitaanermut ataatsimiititaliami siulittaasup neriuutigaa:

- Neriuppunga, uuma aaqqiissutip atuarfimmi angusatigut aamma malunniussinnaanissaa, neriuutigeqaara, pissutigalugu; sumiluunniit piareersarsimalluta takkukkutta aamma atuartitsineq ingerlanneqassaaq piareersarluarsimalluni, Evelyn Frederiksen oqarpoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat