Qeqqata Kommuniani atoqqiineq aallunneqarpoq
Kommunip piujuaannartitsinissaq tunngavigalugu ingerlatsinissamik periusissaa naapertuuttumik maanna Qeqqata Kommuniani atoqqitassanut katersuivimmik pilersitsisoqarpoq. Innuttaasut pequttat, igaffimmi atortut allallu igiinnassallugit iluatinnarpallaartut tassunga tunniussinnaavaat. Taamaaliornikkut innuttaasunut allanut iluaqutissanngortinneqarsinnaapput peqatigisaanillu susassaqarfimmi tassani kommunimi siuttuusumi piujuaannartitsinissaq tunngavigalugu ingerlatsineq nukittorsarneqarluni.
-Atoqqinneqarsinnaasunik tunniussisarfiup ammarneqarneratigut, kommunip 2020-mi atuilluartuunissamik takorluuineranut attuumassuteqarpoq. Atoqqinneqarsinnaasunik atuisarnikkut ikuallaaviup sapinngisamik imminut akilersinnaasumik atorneqarnissaa aallaaviuvoq, taamaalilluni atoqqinneqarsinnaanngitsuinnaat kisiisa ikuallanneqartalissallutik. Tamatuma saniatigut aamma eqqaamassavarput, atoqqiisalernikkut pisattanik allanillu ungasissumiit nukinnillu atuisuusumik assartuisarneq annikillisissinnaagatsigu. Atoqqinneqarsinnaasunik tunniussisarfeqalernitsigut atuilluartuunerup tungaanut qanilliallannissarput neriuutigaara, Hans Frederik Olsen, kommunip teknikkeqarnermut avatangiisinullu ataatsimiititaliaani siulittaasoq oqarpoq.
Atoqqinneqarsinnaasunik tunniussisarfiup ammarneqarneranut atatillugu eqqagassanik avatangiisinut ulorianarsinnaasunut tunniussisarfik aamma
ajornannginnerulissaaq. Atoqqinneqarsinnaasunik tunniussisarfik ulluinnarni nal. 08:00-imiit 16:00-ip tungaanut ammasassaaq. Atoqqinneqarsinnaasut atoqqinneqarsinnaasunik tunniussarfimmukaassinnaanngikkaanni, aaneqarnissaat pillugu kommunip eqqagassanik annertuunik aallertartui
attavigineqarsinnaapput.
-Innuttaasut tamagimmik akisussaassuseqarnissaannut aamma tunngavoq, soorluttaaq aningaasaqarnikkut imminut artukkinngikkaluarluni pequtitaarnissamut imaluunniit
meeqqanut pinngussanik pissarsinissamut atoqqinneqarsinnaasunik tunniussisarfik periarfissaasoq. Taamaattumik atuilluartuunissap qanoq siammasissinnaatigineranut,
atoqqinneqarsinnaasunik tunniussisarfik assersuutissaqqippoq, Hans Frederik Olsen oqarpoq.
