Qeqqata Kommuniani akileraarut qaffassanngilaq
Kommune Kujallermi Qaasuitsullu Kommuniani akileraarutit procentimik ataatsimik sapaatip-akunnerani kingullermi qaffanneqarput, 28 procentinngorlugit, kommunini taakkunani akileraarutit katillugit 45 procentinngorlutik.
Akileraarutit 25 procentiuinnarnissaat Qeqqata Kommuniata sapaatip-akunnerani kingullermi aamma akuersissutigaa, Kommuneqarfik Sermersuumilu ualeru aamma taama pisoqassagunarpoq, kommunini taakkunani marlunni akileraarut taamaalilluni 42 procentiussalluni. Sermitsiaq.ag-imi tamanna allaaserineqarpoq.
Aningaasat 2011-mi missingersuutissat Qeqqata Kommuniani kommunalbestyrelsimut ilaasortat isumaqatigiillutik aamma akuersissutigaat, naak 41,2 millionit koruuninik amigartooruteqarnissaq ilimagineqaraluartoq.
Taamaakkaluartoq siunniunneqarpoq kommunini immikkoortortani decembarip ingerlanerani 5 procentimik sipaartoqassasoq, kommunip 2011-mi amigartoorutissaatut naatsorsuutai 14 millionit koruuninut taamaalillutik appassagaluarmata.
- Aningaasaqarnerput aalajaatsorujussuuvoq, taamaammat kommunimi akileraarutip procentiata 2011-mi 25 procentiunissaa aalajangiusimasinnaavarput, naak annertunngikkaluamik amigartooruteqassagaluarluta, borgmesteri Hermann Berthelsen sermitsiaq.ag-imut oqarpoq.
