Qeqqata Kommunia sanaartugassanut aningaasaleeqqusivoq
Naalakkersuisunut ammasumik allakkat, Borgmesterimit Hermann Berthelsenimeersut, kommunalbestyrelsemi ilaasortat partiit allat aamma atsiortuuffigaat, tassaallutik Atassut sinnerlugu Karl Davidsen, IA-mit Olga B. Ljungdahl kiisalu Siumut sinnerlugu Alfred Olsen.
Namminersorlutik Oqartussat Qeqqata Kommunianut aningaasaleerusussuseqannginnerat kommunalbestyrelsemi ilaasortanit tupigusuutigineqarpoq.
Aningaasanut inatsit 2010-mut atuuttoq malillugu, sanaartugassanut atugassanik Qeqqata Kommunia kommuninut allanut sanilliullugu annikinnerusunik aningaasaliiffigineqarpoq. Soorluttaaq missingersuutini 2011-imit 2013-mut atuuttussami Qeqqata Kommunianut aningaasaliissutissat appasinnerusut, Qeqqata kommunalbestyrelseata, Naalakkersuisunut maluginiaqquaa.
Qeqqata Kommunianut amerlanerusunik aningaasaliisoqanngippat kommunimi suliffissaaleqinerup annertusinissaa naatsorsuutigineqartariaqassasoq, Qeqqata Kommuniani kommunalbestyrelsemi ilaasortat isumaqarput. Suliassanik aallartinneqarsinnaasunik ulikkaarpoq, ingammik inissianik sanaartornerit aallartinneqarsinnaasut, kommunalbestyrelsemi ilaasortat Naalakkersuisunut ammasumik allakkaminni allapput.