Qeqqata Kommunia: Pinngitsaaliissutaanngitsumik inissiinerussaaq
Pinngitsaaliissummilli arsaagaasoqassanngitsoq Qeqqata Kommuniani ilaqutariinnermut pisortaagallartoq Henrik Soloy oqarpoq.
Ilaqutariinnermut pisortaagallartup Henrik Soloy-ip inuit ataasiakkaat pillugit suliat oqaaseqarfigisinnaanngilai, taamaattumillu Ungaaq Poulsenip kommunimut attuumassuteqarnera nassuiarsinnaanagu. Oqarsinnaavorli Qeqqata Kommuniani arnaq 42-nik ukiulik ilisimaarilluaritsik.
- Isumaginninnikkut arlaqartut misilittarsimavagut, oqaloqatigiuarlugulu. Kommunimilu siunnersorteqarpoq.
Radioaviisimi ippassaq oqaluttuaraarput Sisimiuneersup 42-nik ukiullip Ungaaq Poulsenip panini 11-nik ukiulik toqqissisimasumik peroriartortissinnaanngikkaa. Oqaluttuarpoq ilungersunartumik inuuneqarsimalluni, imigassartornermik hashitornermillu kinguneqartumik. Tassa inuuneq meeqqanut naleqqutinngitsoq. Taamaattumik kissaatigaa panimmi pinngitsaalisaalluni arsaarinnissutaanissaa.
Ungaaq Poulsenilli pania pinngitsaaliissummik arsaarinnissutaasinnaanngitsoq Henrik Soloy naqissusiivoq.
- Meeqqat pinngitsaaliissummik arsaarinnissutaasarnerat iliuuseq sakkortoorujussuuvoq. Namminerlu taamaalioqqusinerata kingunerisinnaasaraa pinngitsaaliissutaanngitsumik inissiigallarneq.
Qeqqata Kommuniata meeqqat toqissisimanissaat pingaartimmagu, imaassinnaavoq 11-nik ukiulik pinngitsaaliissutaanngitsumik inissinneqarallartoq.
Ilaqutaariinnermut pisortaagallartup misissuiffigisimavaa, Ungaaq Poulsenip oqaatigisimasaa naliginnaanngitsoq siunnersortinut aninneqarsimanersoq, taamaattoqarsimanngilarli.
Paniali kommunimit ukkatarineqareersoq oqaatigaa. Ungaaq Poulsenip kajumissaarutaata inerneraa panigiit oqaloqatigiinnissamut kommunimiit aggersarneqarumaartut.
- Ilaqutariinnut inissiigallartoqassanersoq allatulluunniit aaqqiisoqassanersoq takussavarput.
Ippassaq oqaluttuaraarput Ungaaq Poulsen isummani malillugu kommunimit eqqunngitsumik pineqartarsimalluni. Siullermik 2006-imi, panini pinngitsaaliissummik arsaarinnissutaasimasoq, kingullermillu siorna utoqqaat illuannit soraarsitaanermi kingorna.
- Sallu tunngavigalugu oqaatsit pillugit meeqqanik arsaarinninneq ajorpugut. Meeqqat inuusuttullu pillugit inatsisit malillugit sulivugut. Meeraq atugarliortinneqarpat ajortumilluunniit pineqarpat isumannaartarparput. Pineqartorli oqaaseqarfigisinnaanngilara.
Aamma 2012-imi pisimasoq oqaaseqarfigisinnaanngilaa sulisoqarnermut tunngasuummat. Uppernarsarpaali arnaq Sisimiuni utoqqaat illuanni sulisimammat suliassartaqarsimasorlu. Isumaqarporli kukkusoqarsimanngitsoq.
- Malittarisassat malinneqarsimapput.