Qeqqata Kommunia Nunatta Karsianit minnaarussaasorivoq

Qeqqata Kommunia, 10.000-it missaanik inoqartoq, aappaagumut inatsisissatut siunnersuummi sanaartugassanut aningaasaliissutini minnaarunneqartutut misigisimavoq.
Allattoq Jens Thorin
oktobarip 28-at 2009 10:44

Sanaartugassanut Nunatta Karsianit aningaasaliissutissanit Qeqqata Kommuniani 20 millioni koruunit atorneqassasut siunnersutaavoq.

Sanaartugassat assigiinngitsut kinguartittariaqalersinnaapput.

Aningaasanut inatsisissatut siunnersuut Qeqqata Kommunianut ajorluinnartoq, kommunalbestyrelsep kingullermik ataatsimiinneranit imaqarniliami allaqqavoq. Assersuutigalugu Sisimiuni Minngortuunnguup Atuarfiata iluarsaannissaanut aningaasaliinissaq kinguartinneqarsimavoq. Taamaakkaluartoq Borgmester Hermann Berthelsen isumallualeriartorpoq.

- Naalakkersuisut isummatik isummatsinnut naaperiartissinnagaat, sapaatit akunnerini makkunani oqaloqatigiinnitsinni malunnarsiartorpoq, borgmesteri oqarpoq.

Maniitsumi inissianut piiarneqartussanut taartaasussanik sanasoqassanngitsoq aamma siunnersuutaavoq, borgmesterilu oqaluttuarpoq, aningaasanut inatsisissatut siunnersuut suliarineqaqqaarmat, illuliortitsinissamut aningaasaliissutissaqanngikkaluattoq.

A/S INI naapertorlugu Qeqqqata Kommuniani initaarusullutik allatsissimasut ullumikkut 1200-put.

Qeqqata Kommunianiittumi Sisimiuni illuliornermi Real kreditimik attartornissamut periarfissaqarpoq, borgmesterilu neriuuppoq kommuni 25 procentimik akileeqataalluni Sisimiuni inissialiortiternerit aasamut aallartissinnaallugit.

Qeqqata Kommuniani innuttaasut nunatsinni akileraarnikinnerpaapput, kommunimut 25 procentimik akileraartarlutik. Kisianni borgmester Hermann Berthelsen isumaqanngilaq, akileraarutinik qaffaanissaq aqqutissaasoq.

- Qaffaassagutta innuttaasut inuuniarnerat oqimaannerulissaaq. Illuanik innuttaasut aningaasaqarnerulernissaannut pisortatut pisussaavugut. Akileraarutit qaffannissaat tamatigut pitsaanerpaaneq ajorpoq, borgmester Hermann Berthelsen oqarpoq.