Qeqqata Kommunia innuttaasunik ataatsimiisitsissaaq
Innuttaasunik ataatsimiisitsineq Sisimiuni Sanaartornermik Ilinniarfimmi ingerlanneqassaaq, inuillu kommunimit tamarmeersut radiokkut malinnaasinnaapput. Radiokkut naalaartartut peqataanissaminnut periarfissaqarput, piffissami 20.15-imit - 21.00-imut sianerlutik apeqquteqarsinnaallutik. Kommunip teknikkeqarnermut avatangiisinullu ataatsimiititaliaani siulittaasoq, Hans Frederik Olsen, naalaartartut apeqqutaannut akissuteqarumaarpoq.
-Innuttaasut sapinngisamik amerlanerpaat atuilluartuunissamik suliniuterput pillugu isummersinnaanerat siunnersuutissaqarsinnaanerallu uatsinnut pingaaruteqartupilussuuvoq. Kikkulli tamarmik innuttaasunik ataatsimiisitsinernut peqataanissaminnut periarfissaqaratillu pilerisunneq-ajorput. Taamaammat innuttaasut sapinngisamik amerlanerpaat angujumallugit ataatsimiisitsinerup radiokkut aallakaatinneqarnissaa oqarasuaatikkullu siunnersuuteqartoqarsinnaallunilu isumassarsianik saqqummiussisoqarsinnaanera misilinniarparput. Sapinngisamillu amerlanerpaanik oqaloqateqarnissara qilanaarivara, Hans Frederik Olsen oqarpoq.
Kommuni novembarip naanerani allamik suliniuteqarpoq, tassanilu innuttaasut kommunip atuilluartuunissamik suliniutaanut peqataatinniarneqarlutik. "Bussi oqalliffik" illoqarfimmi angalaartinneqarmat, inunnik isumaginninnikkut suliniutit Sisimiuni innuttaasunut saqqummiunneqarput. Tassunga atatillugu immersugassanik agguaassisoqarpoq, kommunillu isumaginninnikkut akisussaaffimmik annerusumik tigusisinnaaneranut siunnersuutinik imalinnik utertitsivigineqarpoq.
Ataatsimiisitsineq ataasinngornermi unnukkut 19.00-ip 22.00-llu akornanni ingerlanneqassaaq, kikkullu tamarmik ornigunnissaannut radiokkulluunniit malinnaanissaannut kaammattorneqarput.
