Qeqqata Kommunia guitarerpalaarfiuvoq
Tusarnaartitsinerat Sisimiuni kulturip illorsuanit Taseralimmit aaqqissuunneqartoq Sisimiut oqaluffiani ippassaani aallartinneqarpoq, nunaqarfimmilu Sarfannguit oqaluffiani ippassaq unnukkut tusarnaartitsisoqarluni.
-Guitarertartut taakku marluk nuannersumik eqqumiilaartumik Sarfannguani misigisaqarput tusarnaartitsinissap aallartilernerani narsarmiutannguaq piaraq oqaluffiup matuatigut ammasukkut iseriataarmat, oqaluffimmilu timmiualaariarluni niviarsiarannguamut mimmat. Taassuma assamminik illuttut tigoriarlugu silamut narsarmiutaq tingiseqqippaa, Taseralimmi pisortaq Juaaka Lyberth nalunaarpoq.
Seblon Møldruppilu Itillimut ingerlaqqissapput, oqaluffimmi ualeru nalunaaqutaq sisamanut tusarnaartitsinerat aallartissalluni. Itillimeereerunik Maniitsumut, Kangaamiunut kingullertullu Kangerlussuarmut ingerlaqqissapput.
Taseralimmi aaqqissuisut oqaatigaat, guitarertartut tusarnaartitsiartornissaasa ataqatigiissaanissaa imaannaasimanngitsut, naggataagulli timmisartukkut, sinersortaatit privatillu angallassisoralugit suna tamarmi iluatsittoq.
Taseralimmit aaqqissuussamik operartartoq Josef Josefsen ukioq tusarnaartitsisinneqarpoq. Qaammatip tulliani septembarimi allaalaartumik aamma pisoqassaaq, Boliviamiut sinerissap ilaanut allamut aamma tusarnaartitsiartortussat tikissammata.