Qeqqani avannaanilu meeqqerivinnut akiliutit apparujussuarput

Angajoqqaat 100.000 koruunit ataallugit ukiumut isertitallit akiliisarunnaassapput, meeqqallu ukioqanngitsunit arfinilinnut ukiullit meeqqerivinni sorlerniinneri apeqqutaatinnagit akiliutaat assigiilissapput, akiliinerpaasartullu akiliutigisartagaat affaannanngortinneqassalluni.

Qeqqata kommunissaani borgmesterimut tullinngortussap Siumumeersup Karl Lyberthip, akiliutinik appaasoqarniarnera ima nassuiarpaa:

- Ilaqutariit mikisunik meerallit - pingaartumik akunnattumik akissarsiallit - akiligassanut assigiinngitsunut malinnaaniapiloortarput. Meeqqat pitsaanerusunik atugaqarnissaraluat akissaqarfigineqartarnani. Meeqqerivinnut akiliutip apparujussuarnera qularinngilluinnarpara meeqqat pitsaanerusumik atugaqalernissaannik malitseqassasoq.

Karl Lyberth Siumut, Qeqqata kommunissaani borgmesterimut tullersortissaq taama nassuiaavoq.

Qaasuitsup kommunissaani, kommunit arfineq pingasut kattunnerisigut kommunimi ataatsimi akit nalimmassarniarneqarsimasut Qaasuitsup kommunissaani borgmesterinngortussaq Siumumeersoq Jess Svane oqarpoq:

- Akigititaq ataaseq atorneqartussanngorlugu aaqqinniarsimavarput. Qaffasinnerpaamik akiliuteqartartut appaavigineqarput taavalu isertitakinnerpaat akiliutaarutsinneqavillutik. Aamma akiliutitseriaatsip takujuminarninngortinneqarnissaa siunertamut ilaavoq. Taama oqarpoq Qaasuitsup kommunissani borgmesteriulersussaq Jess Svane.

Kommuneqarfissami Sermersuumi ilaasortat ullumikkut tallimanngornermi meeqqerivimmut akiliutigineqartartut pillugit ataatsimiittussaapput.