Qeqertat innaallagissiorfissamik qilanaarutissaqanngillat

Qaanaap eqqaani nunaqarfinnguami Qeqertani najugallit innaallagissiorfittaarnissartik neriuutigisariaaruppaat.
Allattoq Carla Davidsen
oktobarip 05-at 2011 09:39

Kristian Jeremiassenip Siumumeersup, paragraf 37 naapertorlugu apeqqutaanut, Ineqarnermut, Attaveqarnermut Angallannermullu Naalakkersuisup, Jens B. Frederiksenip, akissutaani tamanna erserpoq.

Kristian Jeremiassenip siunnersuummini oqaatigaa, Qeqertani innaallagissiorfiliornissaq Nukissiorfiit pilersuisussaatitaaneranut ilaasoq.

- Tamanna paatsoornermik tunngaveqarpoq, Jens B. Frederiksen erseqqissaavoq, oqaatigalugulu Qeqertani innaallagissiorfittaassagaluarpata tamanna Nukissiorfinnut amerlanerusunik aningaasaliisoqarnissaanik kinguneqassasoq.

Tamanna akissaqartinneqanngitsoq Jens B. Frederiksen allappoq, naak Qeqertani najugallit atugaat, aamma pisortat innaallagissamik pilersuinnginnerisa kingunerisaanik ulluinnarni ajornartorsiutigisimasinnaasaat, paasilluarsinnaagaluarlugit.

Kisianni nunaqarfimmi innaallagissiorfimmik pilersuinermi siaruarterivittalimmik sananissaq fem aamma ni millionit koruunit akornanni sanaartornermut aningaasaliissuteqarfiusussaavoq. Tunisassiornermut akiusoq kilowatt tiimimut 20 - 50 koruunit akornanni akeqassasoq tamatuma malitsigisussaavaa. Taamaattorli akiviusup akiusup annerpaaffissaa ullumikkut kilowatt tiimimut 3 koruunit 48 oorisusoq taakkunani taamaallaat akilerneqartarpoq.

Qeqertani inuussutissarsiornikkut siuariartortitsinissamut periarfissat paasinarsisinniarlugit Qaasuitsup Kommuniata suleqatiginissaa Naalakkersuisut kissaatigaat, taamaattorli aalajangiiffigisassatut siunnersuut itigartittariaqarparput, Jens B. Frederiksen Kristian Jeremiassenimut akissummini naggasiivoq.