Qeqertat ammaqqinneqarnissaannut aningaasaliisoqartoq

Inuit 22-t, pisiniarfeeraq qaleralippassuillu. Tassa tamakkuupput maanna Qeqertaniittut.
Avannaata Kommuniata, KNI-p, Polaroilip, Tele-Postip Nukissiorfiillu suleqatigiinnerat Qeqertat nunaqarfittut ammaqqinneqarneranik inerneqassaaq. Nukissiorfinniit oqaaseqaat KNR-ip pissarsirisaani taama takussutissiivoq.

Naalakkersuisut ukiormannamut aningaasanut inatsimmi 18,4 millionit koruunit immikkoortippaat, taakku nukissiorfimmut, imeqarfimmut, niuertarfimmut, oqarasuaatinut attavimmut allanullu nunaqarfinngortitseqqittussanut atorneqassapput.
 
Aningaasat immikkoortinneqartut saniatigut Nukissiorfinnut ilapittuutitut aningaasaliissutit 1.8 millionit koruuninut 2020-miit amerlineqarput, Nukissiorfiit oqaaseqaataat naapertorlugu innaallagissiorfiit imeqarfiillu atorneqalernissaanut piareersimassallutik.

Misissuisitsisoqareerpoq 
Qeqertat nunaqarfinngoqqinnissaanik qulakkeerisussamik Vittus Qujaukitsoq 2014-imi misissuisitsivoq. Hans Enoksenillu aningaasanik isaatitsisinnaasunik Qeqertani aalisagarpassuaqartutut oqaatigaa sumiiffillu nunaqarfinngorteqqinneqarnissaa takorusunnerarlugu.
 
Qeqertat ukioq 1988 tikillugu nunaqarfiuvoq, Pituffiulli eqqaaniittutut Moriusatut Qaanaallu eqqaaniittutut Qeqertarsuartut inuerutinneqarlunilu matuneqassasoq aalajangerneqarsimavoq.