Qeqertarsuup Tunuani umiatsiaararsorluni qaleralinniarneq unissaaq

Qeqertarsuup Tunuani umiatsiaararsorlutik qaleralinniat ullut marluk qaangiuppata aalisarnerat unissaaq.
Allattoq Karsten Sommer, Simon Uldum
juulip 30-at 2013 05:33

Kalaallit Nunaanni Aalisarsinnaanermut Akuersissutinik Nakkutilliisoqarfiup nalunaarutigaa, Qeqertarsuup Tunuani sinerissap qanittuani umiatsiaararsorluni qaleralinniarneq sisamanngorpat aggustip aallaqqaataani unitsinneqassasoq.

Qeqertarsuup Tunuani umiatsiaararsorluni qaleralinniarnermi pisassat tamakkerneqalernerat tamatumunnga pissutaavoq.

Sisamanngorpat - aggustip aallaqqaataani - qaleralinnik umiatsiaararsorluni pisanik tunisinissamut periarfiissaassaaq kingulleq.

Angallatinulli meterit arfinillit qaangerlugit angissusilinnut pisassiissutit suli sinneqarput:

Upernavimmi pisassiissutit tonsinik 2.822-nik sinneqarput, Uummannami tonsinik 1.137-inik Qeqertarsuullu Tunuani tonsinik 1.947-nik,  Kalaallit Nunaanni Aalisarsinnaanermut Akuersissutinik Nakkutilliisoqarfik taama paasissutissiissutissiivoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq