Qeqertarsuup Tunuani umiarsuartigut angallanneq sukateriffigineqartariaqanngitsoq
Tassa siunissami umiarsuartigut angallanneq pineqartuni annertuseriassagaluarpat imartat pineqartut immikkut mianernaatilittut nalilerneqarput, pingaartumik uuliakoornermik pisoqarsinnaanera eqqarsaatigalugu.
Nalunaarusiaq saqqummiunneqaqqammersoq qulequtserneqarsimavoq ”Uumassuseqassutsip ataqatigiinnera aallaavigalugu Qeqertarsuup tunuani Ikkannersuarnilu umiarsuartigut angallannerup aqunneqalersinnaaneranik periarfissarsiuussilluni misissuinerit”, taanna Pinngortitaleriffiup nittartagaani aamma atuarneqarsinnaavoq.
Nalunaarusiaq DCE - Aarhus Universitet-imeersunit Pinngortitaleriffimmeersunillu allataavoq.
Nunarsuaq tamakkerlugu silap pissusiata allanngoriartornerata kingunerisaanik Issittup imartaata aasaanerani sivitsoriartuinnartumik imarorsimasalernera umiarsuarnik angallattoqarnerulernissaanik isiginninniarnerujussuaq nalunaarusiami tunuliaqutaavoq.
Immikkut maleruagassiuutissallugu pisariaqanngitsoq
DCE-mi siunnersorti Tom Christensen, nalunaarusiami pingaarnertut allattuusoq, oqarpoq ullumikkut sumiiffinni pineqartuni angallanneq annertugisassaanngereermat taakkunani umiarsuartigut angallanneq immikkut maleruagassiuutissallugu pisariaqanngitsoq.
- Kisianni umiarsuartigut angallannerup avatangiisinut sunniutigisinnaasaanut tunngassutilinni uulia akoorutissallu kemikaliat pineqartillugit Illersornissaqarfiup Kalaallit Nunaata imartaani avatangiisit innarlerneqarsinnaanerinik naliliiniarluni misissuititsinerata naammassinissaa utaqqimaaqqaartariaqassavarput, Tom Christensen oqarpoq.
Taannali siunnersuivoq imartani tallimani mianerisassatut innersuussutigisani uumassuseqassutsit ataqatigiiffiisa killiffiat malinnaaffiginiarlugu avatangiisit allanngorsinnaanerinik maluginnissutaasinnaasunik atortitsisoqartariaqaleraluartoq.
Nalunaarusiakkut uparuarneqarpoq ikummatissanit umiarsuarnit atorneqartartunit nalinginnaasunit arrortikkuminaannerusunik Kalaallit Nunaanni uuliaarluertoqassagaluarpat taama-ittut sunniutigisinnaasaannullu tunngassuteqartut ullumikkut ilisimasaqarfigeqqatunneqarpallaarnerat.
Imartat Qeqertarsuup eqqaatungaaniittut Nassuttuullu avataaniittup Qalerallit Ikkannersuata umiarsuartigut angallannerulertoqassagaluarpat immikkut mianerineqartariaqartussatut toqqartukkat uani takuneqarsinnaapput. Angallannerusoqalissagaluarpat avaqqunneqartalernissaat eqqarsaataasinnaavoq. Umiarsuit ingerlaartarfii aappalungusersunik qalipaasersorneqarsimasunit kippasinnerulerpata, taava naatsorsuutigineqarpoq uuliaarluertoqarnerani mianernarnerpaat tipiffiusinaanerinut periarfissaq mikinerussasoq.