Qeqertarsuup tunuani inuusuttut tarnimikkut anniaateqarput

Inuusuttut Qeqertarsuup tunuani najugaqartut nalaassimasaasa sakkortuut ilai tassaapput kinguaassiutitigut atornerlugaasimaneq naalliutsitaasimaneq toqusoorsimanerlu. Misissuiffigineqartut agguaqatigiissillugit 30 procentiisa ima tarnimikkut ikiligaatigaat qaangeereeraluarlutik uippakajaarnermik nappaateqarnermut ersiutaasartut atugarilersimallugit.  Taamatut nappaateqalerneq nunani allani ajunaarnersuaqarsimatillugu sorsuffinnilu inunnik nappaatigineqakkajuttarpoq.

Inuusuttut katillutik 269-it misissuinermi peqataapput, tarnip pissusaanik immikkut ilinniagalik Sidsel Karsberg Syddansk Universitetimeersoq misissuinermik suliaqartuulluni.

Nunanut allanut sanilliukkaanni Qeqertarsuup tunuani inuusuttut najugaqartut  imminut toqoriaraluarnerit, pinngitsaaliinerillu amerlanerusut misigisarsimagaat misissuinerup ersersippaa.

- Kisitsisit qaffasipput. Iluatinnaateqarpoq misissussallugu Kalaallit Nunaat tamakkerlugu tamanna atuunnersoq. Taamaassimassappat tamanna isumaqassaaq inuusuttut arlaqartut inuunerminni ingerlariaqqinnissaminnut kingunerlutsitsisussanik misigisaqartarsimasut, taama tarnip pissusaanik immikkut ilinniagalik Sidsel Karsberg oqarpoq.

Misissuinerup takutippaa niviarsiaqqat  nukappiaqqanut sanilliukkaanni niviarsiaqqat kinguaassiutitigut atornerlunneqarnerusartut, inuillu aqqunarsimasut toqutaasimasullu amerlanerit takusarsimagaat.

Meeraanermi sakkortuunik misigisaqarsimaneq inersimasunngoriartornermi misigissutsikkut ineriartornermut innarliisisinnaavoq.

-Imminut anniartilluni ajoqqusertalernermik, imminut toqoriartarnermik, nikallungaqqajaanermik allatigullu tarnikkut nappaateqalernermik kinguneqarsinnaasulluni, taama Sidsel Karsberg oqarpoq.

Tarnip pissusaanik immikkut ilisimasalik ilisimatuussutsikkullu suliaqarnermi ikiortitut atorfeqartoq Sidsel Karsbergip Kalaallit Nunaanni ilisimatuussutsikkut misissuinerit allat ingerlakkusuppai, paaserusuppaami Nunatsinni inuusuttut allat aniguereernerup kingorna uippakajaarnermik nappaateqarnermik ersiutaasartut qanoq amerlatigisut atugarineraat. Misissuinermini Ilimmarfik meeqqallu pisinnaatitaaffiisa illersorneqarnissaanut suliniuteqartut siunnersuisoqatigiiffik MIO suleqatigissamaarpai. 

www.circumpolarhealthjournal.net/index.php/ijch/rt/printerFriendly/18378/html