Qeqertarsuup Tunuani aalisartut Karl Lyberthip tunuarnera iluaraat
Karl Lyberthimi qaammatikkaartumik pisassiisalernissamik pilersaaruteqarluni nalunaaruteqaqqaartalermalli Sinerissap Qanittuani Aalisartut Piniartullu Kattuffia akerliunerminik anngussiffigisarsimagaluarpaat, kinguneqanngitsumilli:
- Iluarisimaarparput, taavalu suleqatikkuminaassinnaasarnera eqqarsaatigalugu, soorlu pisassanut aaqqissuinialerami 2014-moortunut tusaasinnaasimanngilaatigut ajorigaluaripput qaammatikkaartumik pisassiisarnerup aaqqissuunneqarnera. Tamakku eqqarsaatigalugit pissusissamisut isigaara, uanga nammineq, suliassaminut artorsarnera taavalu tunuarnera, Hans Kristian Olsen, Sinerissap Qanittuani Aalisartut Piniartullu Kattuffianni siulittaasoq oqarpoq.
Karl Lyberthip kukkussutiminik nassuerutiginnissinnaanera Ilulissani Aalisartut Piniartullu Peqatigiiffiannit iluarisimaarneqarpoq:
- Tassa iluarivarput. Pissutigalugu ataniaannarluni atanianngimmat. Naalakkersuisuusarsimasut siulii eqqarsaatigalugit akerliussutsimik takutitsinerpassuit pisarnikuupput. Kisiannili massakkut Aalisarnermut Naalakkersuisoq kukkunerminik nassuerutiginnilluni tunuarniuteqarnera assut iluarivarput, Peter Olsen, Ilulissani Aalisartut Piniartullu Peqatigiiffianni siulittaasoq oqarpoq.
Peter Olsenilli Naalakkersuisut akornanni pisut kingulliit toqqissimanartinngilai:
- Soorunami toqqissisimananngilaq Nunatsinni taamatut siuttut inissisimaneri piffissaq kingulleq eqqarsaatigalugu. Kisianni neriussuugut aaqqissasut aamma tamanna qaangiukkumaartoq, Peter Olsen oqarpoq.
Karl Lyberthip taartissaatut toqqarneqartoq Finn Karlsen, Aalisarnermut Naalakkersuisutut siornatigut inissisimasareersimammat isumalluarfigineqarpoq:
- Finn Karlsen misilittagaqarpoq. Aalisarnermut Naalakkersuisooreernikuuvoq aamma naapittarnikuuarput maani. Neriuuteqarfigivarput ajunnginnerusumik qaleralinniarneq eqqarsaatigalugu ingerlanneqalissasoq, Peter Olsen oqarpoq.
Sinerissap Qanittuani Aalisartut Piniartullu Kattuffiannit aalisarnermut naalakkersuisunngortoq aamma isumalluarfigineqarpoq:
- Taava aamma neriuutigivarput Finn Karlsen suleqatigilluarumaarlutigu, aamma neriuutigaara Ilulissanut tikeraalaarumaartoq atorfini aallartisimareerpalluunniit, Hans Kristian Olsen oqarpoq.
