Qeqertarsuup tunua uuliasiorfissatut neqeroorutaalerpoq

Qeqertarsuup eqqaani uuliasiortoqarnissaanik NunaOil neqerooruteqartitsilerpoq.

Aatsitassanut ikummatissanullu pisortaqarfiup NunaOil suleqatigalugu Qeqertarsuup Nuussuullu imartaani uuliasiornissaq siunertaralugu neqerooruteqartitsinissaq piareersaarutigileruttorpaa. Neqerooruteqartitsisoqarneratigut uuliasioqatigiiffiit assigiinngitsut Qeqertarsuup imartaani uuliaqarneranik misissuinissamut periarfissaqalissapput.

NunaOil-ilu isumalluarpoq.

NunaOilip 2005-mut ukiumoortumik nalunaarusiani saqqummiuteqqammerpaa. Uuliasioqatigiiffik Namminersornerullutik Oqartussanit DONG-imillu pigineqartoq amigartooruteqaqqippoq. Amigartooruteqarnerali tupinnarpallaanngilaq, uuliamik suli qalluisoqalinngimmat. Allanngortoqariaannaavorli.

Uuliasioqatigiiffiup aatsitassanut ikummatissanullu pisortaqarfik suleqatigalugu uuliasioqatigiiffinnut assigiinngitsunut ukiamut neqeroorutigaat Qeqertarsuup Nuussuullu imartaani uuliasiornissamik misissuisoqarnissaa, NunaOil-imilu pisortaq Hans Kristian Olsen neriulluarpoq:

-Qeqertarsuup Nuussuullu eqqai uuliasiorneq eqqarsaatigalugu uanga pissanganartorujussuartut isigaakka. Ukiuni qulini kingullerni misissuisarnerni uuliamik seeriffiit 100-t sinneqartut nassaarineqartarsimammata. Tamatuma saniatigut Qeqertarsuup kitaata imartaani immap naqqaniit uuliamik seerisoqarnera aamma malussarfigineqarsimavoq sumiiffinni arlalinni. Taamaattumik qularnanngilluinnartumik immap naqqani arlaannik uuliaqarfeqarpoq. Pissanganarpoq uuliasiornermi qillerilluni nassaarfiusinnaanera qanoq annertutiginersoq, Hans Kristian Olsen oqarpoq.

Qaquguli nunatsinni uuliamik qalluisoqalissava?

-Taanna oqaatigiuminaatsorujussuuvoq. Kisianni isumaga naapertorlugu takorloorsinnaavara ukiut qulit 15-illuunniit qaangiuppata uuliamik maani avataani nassaartoqassappat, taava nunarput uuliamik qalluivittut inissisimalertussaassaaq, Hans Kristian Olsen oqarpoq.

NunaOil Namminersornerullutik Oqartussanit danskillu oliasiorfiutaannit DONG-imit avillugu pigineqarpoq.