Qeqertarsuup kommunia nakkutigisaalissanngilaq

Namminersornerullutik Oqartussat kommuneqarfinnut Nakkutilliisoqarfiata Qeqertarsuup kommunea piumasaqarfigaa aningaasaqarnerup ingerlanneqarsimanera pillugu takussutissanik nassiusseqqullugu. Nakkutilliisoqarfiup taama maanna piumasaqarnera Qeqertarsuup kommuniata 2004-imi 9 mio. koruuninik amigartooruteqarneranik tunngaveqarpoq.

-Qeqertarsuup kommuniata aningaasaqarnikkut ingerlanneqarneranut takussutissanik peqareeraluarluta maanna piumasaqaqqippugut, Leif Scharling, Namminersornerullutik Oqartussat kommuninut Nakkutilliisoqarfiata allattoqarfianit taama oqarpoq.

Qeqertarsuup kommuniata ukioq mannamut missingersuusiai Nakkutilliisoqarfimmit misissorneqassapput, misissuinerlu tunngavigalugu qanoq ingerlariaqqittoqarnissaanut siunnersuisoqassasoq Leif Scharling oqarpoq. Qeqertarsuulli kommunia Kommunit Nakkutilliisoqarfiannit nakkutigineqalissanngilaq.

- Kommunit allaffissornikkut ingerlatsinermikkut nakkutigisaalersarnerat qaqutigoortuuvoq, kingullermillu taamaaliortoqarpoq ukiut marluk matuma siornagut. Nakkutiginnilerneq aatsaat pisarpoq kommunep karsia imaarutivissimappat aningaasaqarnerlu aqunneerussimappat, Qeqertarsuullu kommuniani tamaattoqanngilaq, Leif Scharling oqarpoq.

Leif Scharling erseqqissaavoq Nakkutilliisoqarfiup suliassarinngikkaa kommunini aningaasaqarnikkut amigartooruteqarnernut aqutsinerliorsimanernulluunniit akisussaasussarsiornissaq, oqarporli kommunep aningaasaqarneranut kommunalbestyrelset akisussaasuusut, erseqqissarlugulu kommunalbestyrelset siunnersuisiminnik aamma atorfilittaqartarmata.

Qeqertarsuup kommuniata 5 mio. koruuninik atorniarnissamut Naalakkersuisut akuersissuteqarnissaat qinnuteqaatigaa. Tamatuma saniatigut qaammatip tulliani kommunemut tapiissutissat 1,5 mio. koruunit piaartumik tunniunneqarnissaat qinnutigineqarpoq, kommunemi sulisut akissarsiassaqarnissaat pillugu.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat