Qeqertarsuup kommuneani atorfillit kommunalbestyrelselu imminnut pisuuteqattaapput
Sapaatip akunnerani kingullermi maani radioaviisimi oqaluttuaraarput, kommunaldirektøri inuussutissarsiornermilu pisortaq, kommunalbestyrelsemi ilaasortanit assuarineqarnerat. Inuussutissarsiornermi pisortap Kommunaldirektørillu kommunimi inuttaasut ilaasa ilaasoqarlutik angallassinerat unioqqutitsinertut taasimavaat.
Aviisimi AGimi sisamanngormat saqqummersumi, aterminik taasinani, atuartartut allagaannut allagaqartoqarpoq, kommunimi aqutsisut pisuutinneqarlutik – kommunimiilu akissuteqartoqarluni.
Aviisimi AGmi aterminik taasinani kommunimik pisuutitsilluni allagaqartoq, radioaviisimit paasisat aallavigalugit kommunimi atorfilittanit politiinut tunniunneqarpoq.
Qeqertarsuup kommuneani Borgmesteri Augusta Salling pineqartoq pillugu oqaaseqartinniarsimagaluarparput, iluatsissinnaanatiguli.
Kommunimi atorfilittat pillugit, kommunalbestyrelse talimanngormat immikkut ittumik ataatsimiittussaagaluarpoq, aqagumulli ataasinngornermut kinguartinneqarluni.