Qeqertarsuup Kommunea meeqqanik sullissilluarpoq
Qeqertarsuup kommuneani isumaginnittoqarfik meeqqanik sullissinermi nunatsinni ingerlalluarnerit ilagilersimavaat. Meeqqat siornatigut arfineq-pingasut tungaannut amerlassuseqartut sapaatip-akunnerisa naaneranni isumaginnittoqarfimmit aaneqartariaqartarsimapput, ukiunili kingullerni tallimani immikkut ittumik suliniuteqarnerup kingunerisaanik meeqqanik aallertoqassaarsimavoq.
- Pinaveersaartitsinermut tunngatillugu katsorsaavimmik Qaqiffimmik suleqateqalersimavugut, imatut imigassamik ikiaroornartumillu ajornartorsiutilinnik katsorsaaneq ilaqutariinnillu katsorsaanerit ataatsikkut ingerlartilersimallutigik. Isumaginnittoqarfiup pisortaa Bertha Kreutzmann nassuiaavoq.
Suliniutit allat aamma ilagisimavaat, isumaginnittoqarfimmi sulisunik, meeqqat atuarfianni annernut ilinniartitsisumik, napparsimmaveqarfimmi utoqqaallu illuini sulisunik pinaveersaartitsiniarnermut tunngasunik pikkorissaasarnerit.
Qeqertarsuup Kommuneani politiit meeqqanik sumiginnakkanik ukiuni kingullerni marlunni aallertariaqarsimanngillat, politiit isumaginninnerup tungaatigut ilungersunartunik suliaqarsimanngillat, Qimarnguimmut saaffiginnittoqarsimanngilaq innuttaasunillu nikallungarujussuartunik napparsimmaveqarfimmut saaffiginnittoqarsimanani. Tamanna pillugu Bertha Kreutzmann nassuiaavoq, assigiinngitsutigut suliniuteqarnerup iluatsilluarsimaneranut ilaatigut aalajaatsunik sulisoqarluarsimaneq pissutaaqataasoq, ukiuni kingullerni tallimani ataasiinnaq taarsersimalluni. Aammali suliffeqarfiit minnerunngitsumillu innuttaasut suleqataalluarsimanerarpai. Siunissamut qanoq pilersaaruteqarpat ?
- Naatsorsuutigaarput suliniutigut taakku ingerlatiinnarallassallutigik, suli pisariaqartikkatsigu. Aamma neriuutigaarput, kommunalbestyrelsep aningaasaliissutit tungaatigut allannguinissaminik pilersaaruteqanngitsoq, suliniutit iluatinnaqimmata. Kommunit allat siunnersuinnassavakka susassaqartut tamarmik suleqatigiiffiusinnaasuni tamani sapinngisamik suleqatigiilluarniaqqullugit. Bertha Kreutzmann oqarpoq.
Qeqertarsuup Kommuneata 1999-imi aningaasat 40.000 koruunit pinaveersaartitsinermut atugassanngorlugit immikkoortissimavai, aningaasaliissutilli 2000-imit amerlineqarput ulloq manna tikillugu ukiumut katillugit 340.000 koruunit immikkoortinneqartalersimallutik.
