Qeqertarsuup kommunea avannaanut ilanngunniarpoq
Qeqertarsuup kommunea avannaani kommunerujussuanngortussami peqataaniarluni ippassaani aalajangerpoq.
Kommunalbestyrelse tamarmiusoq isumaqataavoq. Qeqertarsuup Kommunea Maniitsup Sisimiullu kommuneanut kattusseqateqarniarluni saaffiginninnikuusimagaluarpoq, taakkuali marluullutik suleqatigiinniarlutik aalajangernerat ataqqineqarpoq. Qeqertarsuup kommuneani Kommunalbestyrelse ataatsimiinnermini eqqartorpaa siusinnerusukkut kommune nammineq periarfissaqartitaanissanik kissaateqarneq. Borgmesteri Augusta Salling inatsisartuni aamma ilaasortaasoq, komuunit kattussuunneqarnissaat inatsisartuni 16 november taasisitsissutigineqarmat kisiartaalluni taaseqataanngilaq, taamatuttaaq Atassutip sinerissami ilaasortaatitatik tusarniaavigigamikkit tamangajammik kommunit iluarsaattuuteqqinnissaannut akuersipput, kommune ataaseq pinnagu. Kommunit kattussuunnissaat pillugu avannaani kommunit septemberimi ataatsimiimmata Qeqertarsuup kommunea peqataaniarnani aalajangiusimasimagaluarpaa, tassalu Qeqertarsuup kommuneani kommunalbestyrelse tamarmiusoq ippassaani aalajangerpoq avannaani kommunerujussuanngortussami peqataaniarluni. Borgmester Augusta Salling Qeqertarsuup kommuneata kommunerujussuarnut kattunnissaanut akerliujuarsimasoq oqaaseqartinniarsimagaluarparput sulinngiffeqarlunili aallaqqavoq, oqarasuaataalu akiumanani.
Nunatsinni kommunit tamarmiusut maannakkut nalunaarutigisimalerpaat Kommunerujussuanngortussamut sorlermut ataniarlutik. Nalunaarfissaq ulloq kingulleq tassaavoq decembarip 31-iat.
