Qeqertarsuup avataani nassaaq gassiinnaagallarpoq uuliaanngitsoq
Misissuineq aallartisimatsiaannartorli gassimik sioraaqqani naammattoorsisoqarpoq, tamatumalu paasinarsisippaa tamaani kulbrinteqarluartoq. Qillerineq pineqartoq qaammatip uuma naajartornerani angorusutaminut aatsaat killissagunarpoq.
Nalunaarutit kingulliit uku skotlandimiut suliffeqarfiutaata taassuma ukiup affaanut naatsorsuusiaani, Londonimi børsimi, ullumikkut tamanut saqqummiunneqartumi, takuneqarsinnaapput.
- Kalaallit Nunaanni qillerinitsinni sullumi siullermi qangali kulbrinteqarsimaneranik paasisaqarnerput qiimmatsaatigaara, tamatumami uppernarsisippaa qalluisinnaanitsinnik ilimagisarput ilumoortoq, Cairn Energymi pisortaaneq, Bill Gammell, oqarpoq, nangillunilu:
- 2010-mi qillerinissatta sinnerisa inernerisa nalilernissaat qilanaaraarput.
Kulbrintimik nassaartoqarnera tsinnerusumi uuliaqarsinnaaneranik ilimanarsititsivoq, kisianni ilumut uuliamik nassaartoqarsinnaassanersoq ilisimaneqanngilaq.
Tuluit Nunaanni aviisi, The Guardian, ullumi allappoq, Cairn Energy uuliamik nassaarsimasoq. Ilisimatitsissutit taakku tusarfinniit kikkuunerminnik taaserusunngitsuneersuupput, uuliamilli nassaartoqarsimaneranik oqarneq ukiup affaanut naatsorsuutini allassimanngilaq.
Cairn Energy ilisimatitsivoq iluliarsuit nakkutigilluarsinnaagitik. Qillerivimmiit kilometerinik 25-nik avasitsigisumi ilulissanik ullormut marluk/pingasoriariarluni taamaallaat avaqquttoqartarpoq, ilimagisamit akuttunerusumik.
