Qeqertarsuup avataani immap naqqata iluani gashydratimik nassaartoqartoq
Gashydrat gassiuvoq sermip sananeqaataanut assingusumik sananeqaatilik, immap naqqata iluani kiviorarsimasuni naqitsinermi kiassutsimillu eqqortumi pilersartoq.
Gashydrat gassimik nunarsuup silaannaanik kissatsikkiartortitsisumik metanimik annertuumik akoqarpoq, imaatalu kiassusaata qaffakkiartornera ilutigalugu gassi taanna anialersinnaavoq nunarsuullu silaannaata kissatsikkiartorneranik sakkortusaasinnaalluni.
Kitaata sineriaata avataani immap naqqani sajuppillatsitsisarluni qilleralunilu misissuinermi paasisat atorlugit ilisimatuut gashydrateqarnera paasisimaavaat.
GEUS-illi ukiumoortumik nalunaarusiamini erseqqissaatigaa gashydrateqarnerata erseqqissumik uppernarsarnissaanut minnerunngitsumillu qanoq annertutigisumik gashydrateqarnerata paasilluarnissaanut misissuinerit qillerinerillu amerlanerusut ingerlanneqartariaqartut.
Nukissiuutitut atorneqarsinnaasoq
Gashydrat aamma nukissiuutitut atorneqarsinnaavoq, nukissiuutitullu atorneqarsinnaanerata sivisunerusumik misileraatigineqarnissaa Japanimi Alaskamilu ukiuni tullerni marlunni pilersaarutigineqarpoq.
Imaata naqqanik misissuinermut peqatigitillugu GEUS nunami aamma misissuivoq, nunap qeriuaannartup silap pissusiata allanngoriartorneranit qanoq sunnigaanera misissuiffigineqarluni. Nunalu qeriuaannartoq aakkiartuinnassappat gassi metani annertooq anialersinnaavoq nunarsuullu silaannaata kissatsikkiartorneranik aamma sakkortusaassalluni.
