Qeqertarsuup avataani aappaagumiit uuliasiortoqalissaaq

Uuliasiortitseqatigiiffissuaq Skotlandimeersoq, Cairn Energy, Qeqertarsuup Nuussuulluu kitaani asaanerani 2010-miit misissuilluni qillerinissamik pilersaaruteqarpoq.
Allattoq Jens Thorin
decembarip 21-at 2009 15:04

Suliffeqarfissuup pilersaarutai Naalakkersuisut akuerissappatigit, Cairn Energy pileraarutigeqqaakkaminit ukiumik ataatsimik siusinnaarluni misiliummik qillerilissaaq.

Umiarsuit uuliamik ujarlernermi atorneqartartut nunarsuarmi pitsaanersaasa ilaat attartorneqassaaq.

- Uuliamik ujarlernermi umiarsuit atorneqartartut pitsaanersorisatta attartornissaanut iluatsitsigatta, Stena Forth Kalaallit Nunaanni imarsiuutigissallugu naleqqulluinnartuuvoq, uuliarsiorluni atorneqartartuni pitsaanersaalluni. Taamaammat iluatsinnera nuannaarutigaqarput.

Taamaalilluta aappaagumiit misissuilluta qillerilerissamut periarfissaqalerput, tassa 2011-mi qillerinata ukiumilli ataatsimik siusinaarluta akuerineqassagutta aallartissinnaassaagut, Cairn Energy-mi tusagassiisarnermut pisortaq, David Nisbet KNR-imut oqarpoq nangillunilu:

- Taamaattoq aaallartitsinnata Kalaallit Nunaanni oqartussaniit soorunami akuersissummik tunineqaqqaartariaqarpugut, David Nisbet oqarpoq.

Taassuma Nunatsinni uuliaqarnissaa qularutiginngeqaa, kisianni isumallualernissamut nangaasaaringallarluni.

- Ilimasuppallaarnissamut siusippallaaqaaq, soorunami pisinnaasarput tamaat aasaru qillerissaagut aammalu ukiuni tulliuttuni qillerisassalluta, David Nisbet oqarpoq.

Tassalu Namminersorlutik Oqartussat akuersissuteqarnissaat tullinnguuppoq.

Tamanna pitinnagu assigiinngitsutigut misissuisoqarsimavoq.

Assersuutigalugu Danmarkimi avatangiisinik misissuisoqarfik Pinngortitaleriffillu avatangiisinik mississuisimapput. Aamma nalilersuinerit tunngavigalugit malittarisassiortoqarsimavoq.

- Kalaallit Nunaata kitaata imartaani uuliasiorluni qillerinerit piviusunngortinneqarnerat ukiuni arlalissuarni suliffissuit uuliasiornermik ingerlataqartut pisortallu oqartussaasut arlallit pilersaarusiorlutik suliaqarnerisa inerneraat, inuussutissarsiornermut aatsitassanullu naalakkersuisoq, Ove Karl Berthelsen oqarpoq.

Aningaasarsiutaasinnaasumik Kalaallit Nunaata imartaani uuliamik qalluisoqarsinnaanera periarfissaqartoq paasinarsissappat, tamanna Kalaallit Nunaanni aningaasaqarnikkut imminut napatissinnaalernissamut annertuumik alloriarnerusinnaasoq, Ove Karl Berthelsenip tikkuarpaa.