Qeqertarsuatsiaani uuliamik maqisoortoqarpoq

Nuup kujataani nunaqarfimmi Qeqertarsuatsiaani, tankeqarfimmit solari annertunerpaamik 1.000 literi sissamut ippassaq ualikkut kuulersimasoq paasineqarpoq.
Allattoq Apollo Jeremiassen
maajip 23-at 2014 07:54

Tankeqarfimmit solari maqisoq nalunaaquttap akunneri arlaqanngitsut kooreersorlu unitsinneqartoq, Polaroil nalunaarpoq.

Tankeqarfimmit solarimik maqisuulersimaneq teknikkikkut ajoquteqartoqarneranik pissuteqassangatinneqartoq maanna misissorneqaleruttortoq, PolarOil nalunaaruteqarpoq.

Tankersuarmit ajoquteqalersimasumit solari tankersuarmut allamut imaqanngitsumut immiunneqarnerani, nunaqarfimmi qatserisartut Nukissiorfimmilu sulisut ikiuunneranni tamanna tuaviortumik pisinnaasimavoq. Taamalu nussuineq ullumi aamma ingerlanneqarluni.

Solari annertunerpaamik 1000 literi sissamut kuussimasinnaasoq PolarOil naliliivoq.

Qeqertarsuatsiaani solarimik maqisuulersimagaluarneq Nuummi politiinut, Kommuneqarfik Sermersuumut aamma Avatangiisit Pinngortitarlu pillugit qullersaqarfimmut nalunaarutigineqareerpoq.

Qeqertarsuatsiaani silaannaq uuliasunnikkaluartoq taamaattoq ikuallattoornissamik aarlerinartoqanngitsoq, PolarOil-imi pisortaagallartup Tage Lindegaardip oqaatigaa.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq