Qeqertarsuatsiaani sap. ak. naanerani pinartorsiortoqartoq
Nuup eqqaani nunaqarfimmi Qeqertarsuatsiaani sapaatip akunnerata naanerani pinartorsiortoqaleraluarpoq. Angut inuusuttoq nunaqarfimmeersoq arfininngormat ullaassakkut nalunaaqutaq tallimanut tanneq qulingiluanngortoq Nuummmi politiinut sianerpoq, oqarlunilu sakkortuumik aallaaseqarluni aamma kommunefogedi ikiortaalu ujariarlugit toqunniarlugit.
Oqaloqatiginerani aamma paasinarsivoq, angutip inuusuttup taassuma arnaa nukaalu illup sianerifigisaata iluani allami toqqoqqasut.
Kommunefogedi ikiortaalu angutip taassuma qunusaarineranik ingerlaaannartumik kalerrinneqarput, taakkulu isumannaatsumut inissereernermik kingorna nalunaarput, angut inuusuttoq pineqartoq aallaammik sakkulisaarluni illuminngaanniit qimaguttoq takuneqarsimasoq.
Qunusaaarinerit ilungersunarnerat patsisigalugu Nuup politiivinit sillimatitat isumaqatigiinniartartullu piareersimatinneqalerput.
Nuuk politiineersut Qeqertarsuatsiaaliarniaraluartut sakkortuumik persernerata isikkivilunneratalu qulimiguulimmik angalasinnaanerat ajornarsitimmagu, politiit sisamat angallammik sukkasuuliamik aallartinneqarput.
Nuummili politiineersut nunaqarfimmut suli apuuterianngitsut, politiit isumaqatigiinniartartuisa, annerusumik suli pisoqaqqerianngitsoq, angut inuusuttoq kommunefogedimut ikiortaanullu tunniutiinnarnissaanik akuersitippaat.
Angut inuusuttoq taanna suliap ingerlateqqinnerani tigusarineqanngilaq, sakkortuumilli qunusaarisimanini patsisigalugit eqqartuuussivimmut sassartinneqarumaartoq Carl Sværd Nuuk Politiineersoq oqarpoq.
