Qeqertarsuarmiut pujortagassaaleqipput
Qeqertarsuarmi pujortartartut ulluni makkunani pujortagassarsiniaraangamik toqqagassaaleqipput. Pilersuisummi pisiniarfiani toqqagassatuaraat Look Mentholit.
- Ajoraluartumik kukkusoqarneratigut cigaretit Princet allallu nungussimapput, Pilersuisumi pisortaq Frederik Olsen KNR-imut oqarpoq.
Pujortaguttulli neriuutissaqarput. Pilersuisoq ullumi ullaap tungaa Aasianniit cigaretinik inniminniivoq naatsorsuutigineqarporlu cigaretit allat aqagu Qeqertarsuarmi pisiarineqarsinnaalerumaartut.
Qeqertarsuarmi pujortartartut ilaat KNR-imut oqaluttuarpoq, illoqarfimmi kioskiutillit ataasiakkaannguit kisimik Aasiannukarlutik Prince-nik assigisaannillu pisiniarsimasut, taakkulu 80 koruunit ataatilaarlugit akilersillugit pisisartunut nioqqutigineqartarsimasut.
- Pisariaqassappat aamma Qeqertarsuup tunuani pisiniarfitsinnit allanit cigaretinik piniarsinnaavugut, Frederik Olsen nassuiaavoq.
Kukkuneq Qeqertarsuarmi Pilersuisumi pisimavoq.
- Pisisartutsinnut assorujussuaq ajuusaarutigaarput taamatut kukkusoqarsimanera. Kisianni tassa Qeqertarsuarmi Pilersuisup aqutsisuisa kukkuneq pinngitsoortissimasinnaagaluarpaat, Frederik Olsen oqarpoq.
