Qeqertarsuarmit Aasiannut immakkut angallasseqqittoqartalerpoq

Allattoq Najaaraq Egede
maajip 29-at 2006 08:50

Qeqertarsuarmi ilaasunik angallassineq aallarteqqilerpoq, tamatumuuna namminersortut ingerlatsisoralugit.

Ilaasartaat aqqaneq-marlunnik ilaasoqarsinnaasutut akuerineqarsimasoq, ”Hvalen”, atorlugu sapaatip-akunneranut sisamariarluni Qeqertarsuarmiit Aasiannukaassisoqartassaaq. Tamannalu ataasinngorpat tulliani unnuakkut nalunaaqutaq marlunut aallartissaaq.

Ataasinngorneq, marlunngorneq, sisamanngorneq tallimanngornerlu angallassiviusassapput. ”Hvalen”-ip unnuakkut nalunaaqutaq marlunut aallarneragut Aasiannut ullaakkut arfineq-marlunut tikittarnissaq anguniarneqarpoq, ilaasut timmisartumik ingerlaqqittussat taamaasillutik assersuutigalugu timmisartorsuaq Kangerlussuarmit aallartussaq angumerisinnaalissavaat, Qeqertarsuup Tunuani illoqarfinni allani unnueqqaallannguaratik.

”Hvalen” ataasinngorneq juunip ulluisa tallimaat aallarnerfigalugu angalaleruni decembarip naanerata tungaanut angallassinissaa, Jens Sallingip ilimagaa.