Qeqertarsuarmi piniartutut inuussutitssarsiutillit ikiliartorput
Ukiut arfinillit kingulliit ingerlaneranni Qeqertarsuarmi piniartutut inuussutissarsiuteqartut amerlassusaat affaannanngorput, tamannalu piniartutut inuussutissarsiuteqarnerup ukiuni kingullerni ilungungersunarsiartorneranik pissuteqartoq, Qeqertarsuarmi aalisartut piniartullu peqatigiiffianni, APPQ-mi siulittaasup, Anders Petersenip oqaatigaa.
APPQ-mi ilaasortat 2004-mi 52-iusimasut 2010-mi 25-inik amerlassuseqalersimapput.
Anders Petersenip oqaatigaa ukiuni kingullerni Qeqertarsuarmi piniartut aningaasatigut isertitaat ilaatigut affaannanngorsimasut, maannakkorpiarlu ilungersunarluinnartumik piniartut inissisimalersimasut, aammalu Qeqertarsuarmi puisit amiinik tunitsiveqanngimmat puisit amii eqqaannarneqartartut.
Royal Greenland A/S saarullinnik qeeqqanillu tunitsiviusinnaagaluartoq, ukiap ingerlanerani silap unerisimannginnera pissutaalluni aalisarneq iluamik ingerlanneqarsinnaasimanngitsoq, Anders Petersenip oqaatigaa.
Qeqertarsuarmi Royal Greenland A/S-imiit paasissutissiissutigineqarpoq Royal Greenland maannakkorpiaq piniartunit tunitsivigineqarsinnaanngikkallartoq, saarullinnik qeeqqanillu tunioraaneq ukiap ingerlanerani nammineerluni unikkiartulersimammat.
- Piniartutut inuussutissarsiuteqarneq ajornakusoortorujussuuvoq, tuniniaavimmi pisanik tuniniaaloorusaarneq kisimi periarfissanngoqqavoq, taavalu piniakkat piniarfissarlu killeqartorujussuullutik anorlertuaannarnera peqqutigalugu. Piniarnermik inuussutissarsiuteqartut massakkut ajornartorsiortorujussuupput, taamaattumillu piniartut inuussutissarsiutinik allanik ujartuisariaqalernikuupput, Anders Petersen oqarpoq.
