Qeqertarsuarmi naartuersittartut ikileriarput
Nunatsinni arnat naartuersittartut Danmarkimi naartuersittartunit pingasoriaammik amerlanerupput, nunanilu avaannarlerni annertunersaalluni. Tamanna allanngortinneqartariaqarpoq. Qeqertarsuarni naartuersittarnerit annikillisinniarlugit iliuuseqartoqarpoq,- iluatsittumik.
Namminersornerullutik Oqartussat inuttaasut peqqinnerulenissaanut pilersaarummi nutaami sulissutiginiarneqartut ilagaat naartuersittarnerit annikinnerulersinneqarnissaat; kisiannili sineriammi napparsimaveqarfinni suliniutit ingerlanneqareerput. Qeqertarasuarmi iliuutsit misilinneqarput, iluatsittumik. Qeqertarsuarmi peqqissaavimmi peqqinnissamut siammarsaasoq Marie Mølgård aperaarput iliuutsitsit suut ingerlanneqarnersut.
- Arnat ernisinnaasut tamaasa naartunaveersatinik atuinersut misissortarpavut, naartunaveersatinillu atuinissaannik neqerooruteqarfigalugit.
Marie Mølgård oqarpoq iliuuserisimasat kinguneqarluarsimasut, 2003- 2004 milu naleqqiullugu naartuersittarnerit marloriaat sinnerlugu ikileriarsimammata:
- 2003 - mi naartuersittut 24-iusimapput, 2004 - milu naartuersittut 28 - iullutik. Ukioq manna taamaallaat qulingiluat naartuersissimapput.
Marie Mølgård aperaarput Qeqertarsuarni iliuutsit nunatta sinnerani atorneqarsinnaasorinerai, akivoq:
- Nukinnik atuinarpoq, kisianni periarfissaq iluaqutaammat atorluarneqartariaqarpoq, Marie Mølgård oqarpoq.