Qeqertarsuarmi meeqqat ikiorserneqartut
Qeqertarsuarmi meeqqat arlallit kinguaassiutitigut atornerlunneqarsimanerat tunngavigalugu innuttaasut avataanit ikiorserniarneqalerput. Qaammatit marluk matuma siorna timersornermik sungiusaasartoq meeqqanik arlalinnik atornerluisarsimasutut unnerluutigineqarmat suliaq aallartippoq.
Qeqertarsuarmi innuttaasut marsip aallartinnerani tupaallatsinneqarput sisorarnermik sungiusaasartoq meeqqat kinguaassiutaanik atornerluisimasutut unnerluunneqarluni politiinit tigummigallagassanngortinneqarmat. Angutip 40-t missaannik ukiullip eqqarsartaatsikkut misissorneqarnissaa tunngavigalugu tigummigallagaanera juulip aqqaneq-aappaata tungaanut sivitsorneqartoq, politimestereqarfimmi politifuldmægtigi Jens Yde ilisimatitsivoq.
Unnerluutigineqartumut suliassaq allarluinnaavoq. Atornerlunneqartut ilaqutaasalu ikiorserneqarnissaat allarluinnaalluni. Taakku ikiorneqarnissaat anguniarlugu taavani kommuni immikkut ilinniarsimasunik inuttalersukkamik suleqatigiissitaliorpoq. Tassani suleqatigiissitami ilaasortaapput nakorsaaneq, politiit, isumaginnittoqarfik atuarfimmilu pisortaq.
Taakku saniatigut inuup pissusiinik ilisimatooq Ernst Peilmann, siunnersorti Karen Lyberth kiisalu pilersaarusiornermi ataqatigiissaarisoq Peter Frederik Gedionsen Qeqertarsuarmut ikiuiartortinneqarput. Peter Frederik Gedionsen Aasianni meeqqat kinguaassiutitigut atornerlunneqartut ukiut arlallit matuma siorna paasineqarmata suleqataasimanini pillugu misilittagaqarpoq ikiuiartortullu ilai aamma assingusumik Narsami suliaqarsimanertik tunngavigalugu ikiuiartortussatut toqqarneqarput. Immikkut misilittagallit taakku eqqugaasunik ikiuiartortinneqarlutik tikisinneqarput. Ikiunerup saniatigut innuttaasunik paasititsiniaasoqassaaq, taamatut atornerluisoqarsimatillugu paasinninnerup kingorna qisuariaataasartut nalinginnaasut paasititsiniaanermi saqqummiunneqassallutik, ilaqutariinnermut pisortaqarfimmiit Ellen Olsen taama ilisimatitsivoq.
Qeqertarsuarmi eqqugaasut qaammatini marlungajanni ikiorserneqarsimannginnerat sivisusimaqisoq taassuma isumaqatigaa. Kommunaldirektørip tassanngaannartumik sulianeranut atatillugu misissuisoqarnerup nalaanni sulinngiffeqarallartinneqarata kingunerisaanik sivitsorsaasoqarsimanera Ellen Olsenip erseqqissarpaattaaq. Taassuma taartissaanik toqqaanissaq kinguarsaataasimavoq, massakkulli Salomine Lorentzen kommunaldirektøriugallarpoq.
- Ilimagisamit meeqqat amerlanerit atornerlunneqarsimapput - qassiunersulli oqaatigerusunngilara, Ilaqutariinnermik pisortaqarfimmi atorfilik Ellen Olsen oqarpoq.
- Ilimagisamit amerlanerusimanersut uagut uppernarsarsinnaanngilarput aamma suliap ingerlakkallarnerani taamaannersoq nipaarsaarukkallarparput, politifuldmægtigi Jens Yde oqarpoq.
