Qeqertarsuarmi kommune nassuiaateqaqqippoq

Qeqertarsuarmi borgmesterimut Augusta Sallingimut peqquserluuteqarsimaneraalluni Qeqertarsuup kommuneata nalunaarusiani qaammatip matuma siuliani Kommuneqarfinnik Nakkutilliisoqarfimmut nassiuppaa. Dorthe Heilmann paasissutissiissaaq:

Qeqertarsuup kommuneata nalunaarusiaa naammaginagu Kommuneqarfinnik Nakkutilliisoqarfiup itinerusumik paasitinneqarumanera, Qeqertarsuup kommuneanit akineqarpoq, akissutigineqartorlu nassiunneqareersoq Qeqertarsuarmi kommunaldirektøri Ove Berthelsen ilisimatitsivoq.

Augusta Sallingip peqquserluuteqarsimaneranik pasilliilluni nalunaarusiaq, Augusta Sallingip Qeqertarsuup kommuneata unnuisarfiutaanik inersuarmillu suliffeqarfittut atorneqarsinnaasumik pisisimaneranik imaqarpoq.

Unnuisarfimmik tunisinermi akigititaasoq ataallugu akiliilluni Augusta Salling pisisimasoq inersuarlu suliffiusinnaasoq suliffeqarfimmit Sallingip uiata soqutigisaqarfigisaanit aamma pisiarineqarsimasoq nalunaarusiami oqaatigineqarpoq.

Aviisi AG aqqutigalugu Qeqertarsuarmi Siumut immikkoortuani siulittaasup Jens Johan Brobergip Augusta Salling, nammineq inuttut soqutigisaminik kommunemilu borgmesteritut atorfimminik immikkoortitsisinnaanngitsutut pisuutippaa.

Jens Johan Brobergip taama pisuutitsinera Qeqertarsuup kommunalbestyrelseata immikkut ittumik ataatsimiinnerani itigartinneqarpoq.