Qeqertarsuarmi kommunaldirektøri soraarsitaavoq

Qeqertarsuarmi kommunalbestyrelse avaqqutiinnarlugu kommunimi atorfilittat iliuuseqarsimammata kommunaldirektøri soraarsinneqarpoq.

Qeqertarsuarmi kommunip pisortaa piffissami aalajangersimasumi akissarsiaqarallarluni soraarsinneqarpoq.

Kommunalbestyrelselu maanna misissuilersaarpoq, kommunaldirektøriusimasoq politikkikkut aalajangiussassanik isummersimassasoralugu.

Kommunip iluani aaqqiagiinngilernermut inuussutissarsiuteqarnermi pisortaasimasoq pisunut tamanut aallaaviuvoq.

Taanna kommunip iluani qinersisoqangajalersoq soraarmat aalajangiunneqarpoq, aningaasanik akiliisitsiniarnermi pisortaasup atorfianut taassuma atorfigisimasaa taputartuunneqassasoq.

Qinersisoqareerneratalu kingorna taamatut aalajangiussisimaneq kommunalbestyrelsenit iluarineqanngilluinnarpoq. Taakku isumaqarmata Inuussutissarsiornermi pisortaasimasup atorfia tamakkiisumik sulisussamik inuttaleqqinneqartariaqartoq.

Kukkunersiueqqissaartoqareerneratalu kingorna Qeqertarsuarmi borgmesteri Augusta Salling kalerrineqarpoq, qinikkat avaqqutiinnarlugit kommunaldirektøri Inuussutissarsiornermi pisortaasimasup atorfigisimasaanik taputartuussilluni suliamik ingerlatsisimasoq.

- Qeqertarsuarmi qinikkat avaqqutiinnarlugit sulisimagunarmat soraarsittariaqarsimavarput, pisorli eqqartuussisuserisumit suliarineqarpoq, Qeqertarsuup borgmesteria pisup inummut tunngassuteqarnera tunngavigalugu itinerusumik nassuiaarusunngitsoq taama oqarpoq.

Qeqertarsuarmi aningaasaqarnermi pisortaq utaqqiisaarutaasumik kommunaldirektøritut sulisinneqarallarpoq.