Qeqertarsuarmi erngup tunisassiarineqalernissaa aallartisarneqarpoq

Qeqertarsuarmi erngup tunisassiarineqalernissaa pillugu piginneqatigiiffiliornissaq isumaqatigiissutigineqarpoq, KNI Pilersuisup, SIK-p suliffissaqartitsiniarnermut aningaasaateqarfiata kommunalbestyrelse-milu ilaasortat, ataatsimiinnermi kingullermi isumaqatigiissuteqarnerisigut.

Qeqertarsuarmi borgmesteri, Augusta Salling oqarpoq,

Aningaasaliisinnaasunik allanik aamma pissarsiortoqassasoq, maannamullu kommune 1,2 millioni koruuninik aningaasartuuteqareersimasoq. Suliassat piaarnerpaamik ingerlalersinnaanerat anguniarlugu selskabimik pilersitsiniarneq piaartumik aallartinneqarput.

-Taava qalluisinnaaneq aammalu tuniniaasinnaaneq taassuma akuersissutitaa pigilerutsigu, taava sanaartornerit pilersaarusiorneqareersimallutik aallartissinnaalissapput. Tassanngaanniillu qaqugu tunisassiuinneq aallartissinnaanersoq aatsaat takuneqarsinnaalissalluni, Augusta Salling oqarpoq.

Augusta Salling aamma oqarpoq, ukiut marluk ingerlaneranni tunisassiulernissaq immaqa piviusunngorsinnaassasoq, aallartisarnerinnarmilu 40 millioni koruunit missiliorlugit atorneqartariaqassasut. Taamaattumillu aningaasaliisinnaasunik allanik ujarlernissaq aamma pisariaqassasoq.