Qeqertarsuarmi amigartoorneq innuttaanut tuttussanngorpoq
Qeqertarsuup kommunia siorna 2004-mut aningaasartuutimini 9 million koruunit missaannni amigartooruteqarpoq. Amigartooruteqarneq Qeqertarsuarmi massakkut kommunalbestyrelsiusup siuliisa aningaasanik nakkutiginnilluarsimannginnerannik peqquteqarpoq tamannalu innuttaasunut massakkumiit annertuumik
malunniuteqartussanngortoq, Qeqertarsuup borgmesteria Atassutillu siulittaasua Augusta Salling oqarpoq.
- Ukiumi 2003-mi akileraarutit kommunit allat pisassaralui kommunep nammineq isertitatut naatsorsuusiorsimavai, taamaalillunilu 2003-mi amigartoornissaagaluaq sinneqartoorutitut isikkoqalersimalluni. Tamanna 2004-mi paasineqarmat aningaasat pineqartut kommuninut utertinneqartariaqarsimapput, taamaalillunilu Qeqertarsuup kommuniata 2004-mi aningaasaqarniarnera ajorseriarujussuarsimalluni.
Tamatuma saniatigut sanaartugassat 2004-p missingersuusioqqaarnerani ilaatinneqarsimanngitsut, karsiniittuutinik aningaasalerlugit aallartinneqarsimapput. Tamakkua saniatigut inunnik isumaginnermi ingerlatsinikkut atuarfeqarfimmilu aamma sippuisoqarsimavoq, Augusta Salling nassuiaavoq.
Qeqertarsuarmi siunissami sanaartugassat inuussutisssarsiutitigullu inerisaaneq amigartoornermit aamma eqqorneqassapput. Amigartoornerup kingunerisaanik 5 million koruuninik atorniarnissaminik kommunalbestyrelse Naalakkersuisunut aamma saaffiginnissuteqarpoq.
- Kommunep karsiata aningaasaatai sulisinneqarsinnaasut qaammatip sinneranut annikitsuararsuusarput, taamaattumik kommune atukkerneqassanngippat, allatut ajornartumik massakkut sukaterisimanitta saniatigut sipaarniutinik annertuunik ujaasisariaqalissaagut.
Qeqertarsuup aningaasatigut makinniarnissaa innuttaasunut annertuumik malunniuteqartussaassasoq Augusta Salling oqarpoq.
Kommuninik Nakkutilliisoqarfiup Qeqertarsuup kommuniata 9 mio. koruuninik amigartooruteqarnera pissutigalugu misissuinissaa naatsorsuutigigini Augusta Salling aamma oqarpoq.
