Qeqertarsuaq pujortarfiujunnaarniarpoq
Kalaallit Nunaanni innuttaasut 66 procentii pujortartartuupput, tamanna annertuallaarujussuarpoq Qeqertarsuarmiullu tamanna allanngortinniarpaat. Qeqertarsuup peqqissaaviani nakorsaq Erik Søndergaardip oqarneratut pujortarunnaarneq peqqinnissamut suliniutini tamani peqqinnarnerpaajuvoq. Pujortartartutut iliuuserisinnaasaq pitsaanerpaaq tassaavoq pujortarunnaarneq.
- Suliniut aallartereerpoq maannamullu Qeqertarsuup peqqissaavia pujortarfiujunnaareerpoq. Peqqissaavimmi sulisut sulinerup nalaani pujortarneq ajorput. Tamatuma kingunerisaanik sulisut amerlanerpaat pujortassaavinnikuupput maannalu sulisoq ataaseq kisimi suli pujortartartuuvoq, Erik Søndergaard oqarpoq. Taassumallu ilassutigaa suliniut sioqqullugu peqqissaavimmi sulisut affaasa missaat pujortartartuusimasut.
Suliniummik aallarniisut Qeqertarsuarmi atuarfik isumassarsiamut matumunnga ilanngutsereerpaat, Erik Søndergaardillu oqarneratut, atuarfik aasaanerani atuanngiffeqarnerup kingorna ammaqqippat, Qeqertarsuarmi pujortarfiunngitsut ilagilissagaat. Suliniuteqartullu neriuutigaat suliffeqarfiit allat paaqqinniffiillu, assersuutigalugu kommuuni suliniummut peqataalerumaartut.
- Suliniut isumassarsiarlu saqqumilersinniarlugu tujuuluaraliortoqassaaq allannilinnik ”Qeqertarsuaq pujortarfiunngitsoq! 201?”, kalaallisut qallunaatullu, Erik Søndergaard oqarpoq.
Suliniutip taaguutaa ”Qeqertarsuaq pujortarfiunngitsoq! 201?”, apeqqummik naggasigaavoq, suliniut qaqugorpiaq 2020-nngortinnagu anguneqassanersoq nalunarallarmat.
