Ole Tobiassen ilaqutaalu akunnattunik isertitaqarput, taamaalillutik ineqarnermut tapiissutinik imaluunniit meeqqerivimmut tapiissutinik pissarsisinnaatitaanngillat.Assi: Pauli Wille

Qeqertarsuaq: Akiligassat akilereerlugit ilaqutariinnut 2000 koruunit

Kommune Qeqertallip ineqarnermut akiliutit qaffaaviginiarlugit aalajangereeraa Qeqertarsuarmeersup Ole Tobiassenip siunissaq ernumanartoqartippaa.

Qeqertarsuarmeersoq 56-inik ukiulik Ole Tobiassen ilaquttaalu, tassaasut nulia, panissai marluk ernutaallu Kommune Qeqertallip inissiaataani attartortut 468-it attartornerminnut akiliutiminnik aapriilip aallaqqaataanit procentinik qulinik qaffaavigineqartussat ilagaat.

AAMMA ATUARUK Kommune Qeqertalik: Ineqarnermut akiliutit procentinik qulinik qaffanneqalersut

Tamanna nuannaruutiginngilluinnarpaat.

- Akunnattumik isertitaqartunut appakaassimasuusugut, akilersuutigut tamaasa akilereerlugit qaammammut inuussutissatut sinneruttarami 2.000 koruunit aammalulaannguaq imaluunniit inulaarlugit. Taamaammat akitsuisoqarnissaa taamannak isukkulik akueriuminaatsittorujorujussuuara. Uagutsinnut aallertoqaqqinnera uagut inuuniarnitsinnut annertuumik sunniuteqartussaagami, Ole Tobiassen oqarpoq.

Ole Tobiassen kommunip ataani silami sulisuuvoq. Ilaqutariit qaammammut 3.600 koruuninik akiliisarput, tamannali apriililli aallaqqaataanit 3.960 koruuninngussaaq.

- Pitsaalaartunik atisarsisinnaajunnaarnikuuvugut, taannalu annerusumik inorsaatigilertussaavarput. Suli annerusumik inuussutissat ulluinnarnilu atugassat tungaatigut artorsarninngortussaavugut. Aningaasap pissarsiarinissaa sipaangaqarsinnaanissarlu inornartorujussuanngortussaapput. Inornareeqisoq inornarseqqittussaagami.

Ineqarnermut tapiissutinik pisinnaatitaanngillat

Kommune Qeqertallip, kommunalbestyrelse attartornermut akiliutinut qaffaanissamut aalajangiinnginnerani, qaffaaneq siusinaartumik pensionisialinnut, utoqqalinersialinnut, suliffissarsiortunut aamma pissaatikittunut qanoq sunniuteqassanersoq misissuiffigisimavaa. Kommunillu matumani naatsorsorsimavaa pineqartut ineqarnermut akiliutaasa qaffaavigineqarnissaasa 98 procentia ineqarnermut tapiissutigineqartartumit matussuserneqarumaartoq.

Ilaqutariilli Tobiassennikkut ineqarnermut tapiissutinik pisinnaatitaanngillat. Inoqutigiimmi isertitaat, qinnuteqarnermi  minnerpaaffissatut killigititaasumit amerlanerulaannguarput.

- Uagut pisinnaatitaaffeqanngilagut akunnattumik isertitaqartuusugut. Tamakku sinnilaannguarlugit oorisiaqaratta meeqqerivimmulluunniit taperneqarsinnaanngivippugut. Sumilluunniit tapiissummik pissarsisinnaanngilagut. Ajorarluartumik, taamaattorli aallerfigineqartussanngorpugut annerpaamik, Ole Tobiassen oqarpoq.

Aserfallatsaaliinermut akiliuteqartareerput

Kommune Qeqertallip inissianut attartortittakkaminut akiliutinik qaffaanermigut inissiat attartortittakkat iluarsartuunnissaannut aningaasartuutinut matussutissanik pissarserusuppoq, soorlu aamma kommune sanaartugassanut pilersaarutit aningaasalersorneqarnissaanut taamaaliornermigut aamma qulakkeerinnikkusuttoq.

Tamannali Ole Tobiassenip paasiuminaatsippaa, ilaqutariimmi inissiap aserfallatsaalinissaanut attartornerminnut akiliutigisartakkamikkut ullumikkut aamma akiliiffigisareerpaat.

Taannalu atorfissaanut atuinnarlugu, attartornermut akiliutit qaffanneqartussaanngikkaluartut isumaqarpoq.

- Taavali uani apeqqut saqqummerpoq: Illup piulerneranit uagut akiliutitsinnut ilaareertoq, aserfallatsaaliinermut akiligaq, taakkuamita ooritai sumut atorneqarsimagamik?

Kommune Qeqertalimmi borgmesteri, Ane Hansen (IA) oqarpoq Kommunip inaataanut  attartornermut qaammammut akiliutaasartuni aserfallatsaaliinermut akiliut, siunertamut, tassalu aserfallatsaaliinissamut atorneqarnissamut naammanneq ajortoq. Tamannalu pissutigalugu attartornermut akiulitit qaffanneqartariaqartut.

- Tassa taanna tamatigut inuuttarpoq, soorlu Kommune Qeqertalimmi inaatitsinni 468-ini inissiaqarfinni immikkoortortaqarfiit tallimaasuni inissiaqarfinni immikkoortortaqarfii arlallit taperneqartariaqartarput nalinginnaasumik ingerlatsinissamulluunniit isertitat inuummata. Uffa inatsit oqartoq ineqarfinnik ingerlatsineq atuisut akiliutaasa matusassagaat.

Politikkikkut siammasissumik isumaqatigiissut

Attartornermut akiliummik qaffaanissaq, anguniakkamut, politikkikkut anguniakkamut tamakkiisumik tapersikkamut, tassalu inigissaarnerulernissamut alloriarnerusoq, akitsuinerlu naapertuuttuusoq borgmesteri isumaqarpoq.

- Tassa naapertuuppoq. Kommune Qeqertalimmi, Kommune Qeqertalinngormalli ataasiaannarluta 2 procentimik qaffaanikuuvugut. Paasisagut imaakkaluartut ukiorpassuarni nalinginnaasumik aserfallatsaaliinermulluunniit taavalu inigisap ingerlanneqarneranut isertitat imminnut naapertuutinngittorujussuit, akitsuisoqartarsimannginnera pissutigalugu, oqarpoq naggasiillunilu:  

- Taava Kommunalbestyrelse nutaat sulilluni aallartikkami siammasissumik isumaqatigiissuteqarnikuuvoq, partiit tamarmik, aamma tassunga ilaalluni kikkut tamarmik toqqissisimanartumik angerlarsimaffeqarnissaata tungaanut sulissasugut, aamma inigisaat, inissiaatitta pitsanngorsarujussuarnissaat anguniagaalluni.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat