Qeqertarsuaq aalisakkerivittaarpoq

Qeqertarsuarmi sulifissanik nutaanik 40-inik pilersitsisoqarpoq aalisakkerivik nutaaq ippassaq ammarneqarmat. Qeqertarsuarmi aalisakkerivittaaq sapaatip-akunnerata tulliani tunisassiorluni aallartittussaq suliffeqarfimmit namminersortumit Nukik Seafood-imit pigineqarpoq. Qeqertarsuarmi tunisassiorfittaaq pillugu Nukik Seafood-ip pisortaa

Petrus Bilmann ima oqarpoq:

-Fabrikki saattussanik aammalu aalisakkanik qaleraliunngitsunik tamanik tunitsisassiorfiussaaq, maannakkulli saattuaannaangallartunik tunisassiorallassaaq.

Saattuanik tunisassiornerup saniatigut aalisakkat suulluunniit kanassunut allaat aalisarsinnaanermut akuersissuteqartunit tamanit tunineqarsinnaalissapput. Aammali soorlu inuusuttut piumasut aalisarlutik tunisaqakutsoornissamut aamma tikilluaqqusaassasut Petrus Bilmann oqarpoq.

Suliffissuartaaq katillugit 40-inik aalisakkerisoqassaaq. Saattualeriffimmi holdit marluussapput tamarmik qulinik inuttallit, taavalu aalisakkerivittaani aamma holdit marluussapput tamarmik aamma qulinik inuttallit. Suliffissuup ukioq naallugu ammasarnissaa sapinngisamik anguniagaasoq Petrus Bilmann oqarpoq.

- Sikuunnginnerani aalisakkat tunisassiarineqassapput aammali ukiukkut sikuunerani qaqitat aamma tunineqarsinnaassallutik.

Tunisassiat avammut aammalumi sinerissamut tunisassiarineqassapput, apeqqutaalluni suut tunisassiarineqarnersut.

Qeqertarsuarmi aalisakkerivik tunitsiviutigisoq ammarneqartoq kisimiissanngitsoq Petrus Bilmann oqarpoq.

- Nukik Seafood-ip siunertarilluinnarpaa siuarsaajuarnissani, suleqatigiinnerlu aqqutigalugu taama piursaaniarpugut. Siullermik Avanersuup kommuneani Savissivimmi qerititsiviliisoqassaaq, tassani Savissivimmiut eqqaamiuilu tunisisinnaalissapput. Kujataani Nanortalik, Narsaq Qaqortorlu aamma piorsaaffigineqassapput, taamatullu Tunumi Tasiilap Illoqqortoormiullu kommuniini aamma tunitsiveqalernissaa pilersaarutaavoq.

Siunissami tunitsivissat qassiunissaat erseqqissumik eqqaasinnaangikaluarlugu Petrus Bilmaanip Tunumi aalisariutinik marlunnik tunitsiviliisoqassanerarpaa. Kuummiuni Illoqqoortoormiunilu Arctic Green Food-ip tunitsivii tunitsivigineqassapput.

Tunitsiviit eqqartorneqartut ukiup matuma ingerlanerani piuviusunngortinniarneqarumaartut Petrus Bilmann oqarpoq.

Nukik Seafood-imik piginneqataapput KNI, Arctic Green Food aamma aalisakkerinermik suliffeqarfik namminersortoq Polar Seafood.