Qeqertani innuttaasut pinaveersaartitsinermik sammisaqarput
- Inuttut iluaqutigeqaara, Qeqertani najugalik Amalie Jeremiassen kaperlassiulernermini nikallornerminut tunngatillugu oqaloqatigiissinnaanissamut sakkussaqalersoq oqarpoq, pitsaaliuisoqartarnissaalu pisariaqarsoraa.
- Tassa pisariaqartitsivugut, soorlu inuttut allatulli. Soorlu siornatigut taamaattumik takunngisaannarsimasugut, aqqutit makkua pillugit, soorlu helikoptereqartannginnerput tassani peqqutaavoq. Tikinneqajuitsugut siornatigut tamakkuninnga ajoraluartumik. Qujanartumilli tikittalerput tamaanga, Qeqertani najugalik Amalie Jeremiassen Qaasuitsup kommuniani pitsaaliuinermut pisortap Helga Nielsenip aamma pitsaaliuinermut siunnersortip Tukummeq P. Hensonip tikeraarnerisa kingorna taamatut oqarpoq.
Qaanaarmiut nunaqarfimmiullu pitsaaliuinermut tunngasunik paasisitsiniaaffigineqaqqammerput, soorlu inuunerittami anguniakkat pillugit, siusinaartumik pinaveersaartitsinermut tunngasunik.
Qeqertanilu ikorfartueqatigeeqalernissaanut piumassuseqartoqarpoq.
- Tassani pikkoriffitik nammineq atorlugit gruppilioqattaarniarput, assersuutigalugu pujortarunnaarniartoqaruni, taavalu pujortarunnaartoqarsimalluni taakkua ataatsimoorlutik paasissutissat uagutsinnit pissarsiareriarlugit ingerlateqqittarlugit nammineq nunaminni, Helga Nielsen oqarpoq.
Suliniutigineqartut Amalie Jerimiassenip iluaqutigivai. Misigissutsinillu ikioqatigiilluni oqaloqatigiiffiusinnaasutut neriuutigai.
- Oqiliallattutut misigisimavunga. Inuunitsinni maani. Soorlu uannut assersuutigissaguma, kaperlaap nalaani maani nunaqarfitsinni assoroornartutut uanga misigisarakku. Taarsuaq. Angerlarsimaffitsinni qulleqarniarneq taanna assorsuaq ilungersunarpoq. Soorluluunniit kaperlalernissaa siooragilersarpara, inuuneq nuannerunnaarluni, Amalie Jeremiassen oqarpoq, Eqimattat oqaluuserisassat aallaavigalugit Qaasuitsup kommuniani pitsaaliuinermik immikkoortortaqarfik attavigineqartarumaarpoq.