Qeqertamik tigusineq suusupaginninnerunerarpaa
Canadamiut sakkutuui qeqertaaqqami Avanersuarmiittumi Hans Ø –mi illuatungerisatik akuersiteqqaarnagit sungiusarsimapput, tamanna annertuumik suusupaginninnerusoq, Nunanut allanut Naalakkersuisoq Josef Motzfeldt oqarpoq.
Canadamiut nunanut allanut minesteriata Bill Graham –ip Hans Ø sapaatip akunnera sioqqullugu tikeraaleraa, canadamiut sakkutuuvi Hans Ø –mi sungiusarsimapput. Danmarkimi Canadamiut aallartitaat Ritzau-mut oqarpoq, sakkutuut sungiusaleramik qeqertaaqqap canadamut atanera naqissuserniarlugu erfalasulersimanerat pissusissamisoortoq, namminerlu paasisani malillugit qeqertaaraq Canadamut atasoq. Tamanna Josef Motzfeldt –ip isumaqatiginngilaa.
- Nunap illuatungerisaannaap kisimiilluni tamanna aalajangersimassappagu, FN-i qularnanngilaq Canada uparuagassarissagaa. Nunanut allanut ministereqarfik suliassamik taassuminnga suliarinnissasoq kalerripparput. Taakku Canadamiut aallartitaannut sakkortuumik tunniussisariaqarput, Josef Motzfeldt oqarpoq.
Lars-Emil Johansen Folketingip nunanut allanut tunngasunik ataatsimiisitaliaani ilaasortaq, oqaaseqarumanani ilisimatitsinera oqarniutaannartut nalilernerarlugu Josef Motzfeldt oqarpoq, suliassarmi ukiut 30 –it missaanni ingerlareersimammat qularnanngitsumillu suliassaq attorsimanngimmagu.
- Isumaqanngilanga danskit sakkutuuinit qeqertaq taanna atorneqassasoq, innimigisariaqarpormi nunat tamat aalajangigaannik aalajangiiffigineqanngimmat.
Danskit nunanut allanut ministereqarfianit canadamiut unioqqutitsisimanerarneqarnertik akerlileraat, Danmarkip Radioanit internet –ikkut allaaserineqarpoq.
