Qeqertami tillinniat tigusarineqarput
Angutit marluk Qeqertami Pilersuisup pisiniarfiani ataasinngornermi oktobarip arfineq pingajuanni tillinarput, tassani 70.000 koruuni missaannik tillinnermi saniatigut atortorissaarutinik soorlu, mobiltelefoninik qinngutinillu tillipput.
Tillinniareernermilu kingorna nunaqarfimmut Saqqamut aallarput, tassanilu aningaasat tillitamik ilaat atorpaat, angutillu allat sisamat tillitanik tuniniaaqqipput.
- Nunaqarfimmi arlaannik pisoqaraangat inuit qapputilertarput, tillinniarnerlu aamma eqqartorneqanngittuunngilaq, Ilulissani politeeqarfimmi pisortaq Janus Eigaard oqarpoq.
Politiillu paasiniaanerata nalaani nunaqarfimmi inuit saaffiginnittut amerlapput, tillinniarnermullu atatillugu angutit arfinillit sulerisimaneri tamarmik paasineqarput.
Naggataanilu angutit taakkua tallimanngormat Ilulissani imerniartarfilerinialeruttortut politiinit tigusarineqarput, tassanilu aningaasat tillinneqarsimasut ilaat 52.000 koruunit nassaarineqarput.
