Qeqertaasaq sunaaffa qeqertaq
Qeqertaq Tunup avataani ukiut marluk aappaata affaata siornatigut nassaarineqarpoq – nunap assingani qeqertaasatut titartarneqarsimagaluarpoq – kisianni sermersuaq silaannaap kissatsikkiartornerata kinguneranik tunuariartormat qeqertaasoq paasinarsivoq.
Taanna qeqertaq “nutaaq” ulluni kingullerni soqutigineqartorujussuuvoq – minnerunngitsumik Amerikamiut tusagassiorfiini – tassa silaannaap allanngoriartorneranut oqallinnermut atatillugu.
Taamatut qeqertanik assigisaannilluunniit nassaartoqartarnissaa sermip aakkiartorneranut atatillugu ilimagineqartariaqartoq – sermersiooq Andreas Ahlstrøm Danmarkimi Kalaallit Nunaannilu ujarassiuutut misissuiffimmi GEUS-imeersoq oqarpoq.
Tassa sumiiffinni assigiinngitsuni sermip tunuariartorneranik pissuteqarpoq, tassaasinnaalluni sermeq iigartartoq imaluunniit sermersuaq. Matumani pineqarpoq sermersuup anillanganera ima tunuaammisimatigisoq imaq sermersuarmit qallerneqarsimagaluartoq uleerneqarsimalluni, taamaalilluni qeqertaasaasorineqaraluartoq qeqertaasoq paasineqarluni.
Taamaattunik amerlanerusunik sumiiffinni allani takusalissajunnarsivugut, maannami soorlu Qimusseriarsuarmi taamaattunik takusareerpugut.
Qeqertaasaasorineqaraluartup qeqertatut paasineqarnera annerusumik isumaqanngilaq, tassa takussutissaaginnarpoq inuit sermersuup tunuariartornera isaannarminnik takusinnaagaat.
Tamakkua silaannaap allanngoriartorneranik takussutissat pingaaruteqarsinnaapput, soorlu Kalaallit Nunaanni sermersuup allanngoriartorneranik misissuiffivut takuniarlugit angalagaangatta inuit allanngoriartornernik takusinnaasaminnik oqaluttuukkusuttartorujussuuaatigut paasissutissallu taamaattut uatsinnut iluatinnartuupput, sermersiooq Andreas Ahlstrøm naggasiivoq.
