Qeqertaasami Ungavami tuttut sapaatit akunnerani uani eqqartorneqassapput
George Riverimi tuttut amerlassusaat ukiuni kingullerni 20-ni 50%-it sinnerlugit ikileriarsimapput, maannalu 38.000-iinnanngorsimallutik. Tuttut taakku Nunavimmi Nunatsiavumilu uumasuupput.
Inuit indianerillu nunap immikkoortuinit assigiinngitsunit arfineq marlunneersut ataatsimiinnermut peqataassapput, ataatsimiinnerlu Nunavutsiami naalakkersuisut siulittaasuannit Sarah Leomit aammalu Adamie Alakumit Nunavimmi Makivimmeersumit aqunneqassaaq. Naalakkersuisunit suliniaqatigiiffinniillu allanit qaaqqusisoqarsimanngilaq.
Sarah Leo Labradorip radioanut oqarpoq nunap inuiisa sumiiffinnit arfineq marlunneersut imminnut tatiginerulernissaat pingaaruteqarmat allanik qaaqqusisoqarsimanngitsoq, ataatsimiinnermi pisussaq qeqertaasami Ungavami nunap inuiisa tuttut pillugit suliniaqatigiiffiisa pisortatigoortumik ataatsimiinnerisa siullersaraat.
Ataatsimiinnermi aappaagumut pisassiissutigineqartussat aammalu George Riverimi tuttut aqunneqarnissaannut ukiunut pingasunut periaasissaq eqqartorneqassapput. Aammattaaq tuttoqatigiit allat marluk, Leaf Riverimiittut Tornganiittullu, inunnut sumiiffimmi najugaqartunut pingaaruteqartut eqqartorneqassapput.
