Qeqertaaqqani kalaallit unamminiuaartussat ajunngitsut

Qeqertaaqqani, Shetlandini, timersuutinik assigiinngitsunik ukioq allortarlugu unammiuaartarnerit ukioq-manna aamma pisussaapput, ullumikkut aallartittussaallutik.

Unammiuaarnissamut kalaallit peqataajartortut katillugit 74-it tamarmik ajoratik apuuttut, Sermitsiami tusagassiortoq, Noah Mølgård, aamma angalaqataasoq, Radioaviisimut ullumi oqaluttuarpoq.

Noah Mølgård aamma oqarpoq, Londonimi ippassaani peqqarniisaarujussuartoqarneranut atatillugu namminneq tupinnanngitsumik assut paarilluarneqarlutik, soorlu hoteliminniit anisimagunik uteqqinnerminni pappialat ilisarnaatiminnut arlaannulluunniit imminnut tunngassuteqartut pingasoriarlutik misissorneqartartut. Tamannali Noah Mølgårdip assut toqqissimanarneqarpaa.

Unammiuaarnerit ingerlanneqarneranni timersuutit assigiinngitsut tallimat ingerlanneqartussaapput, tassa atletikerneq, nerrivimmi arsaararneq, badminton, wolleyball aammalu isikkamik arsarneq.

Qeqertaaqqani unammiuaarnerit sapaatip akunnera ataaseq ingerlanneqassapput, tassa julip ulluisa 16-iata tungaanut. Noah Mølgård unammiuaarnernit tusagassiisassaaq unnukkut kalaallisut Radioaviisip kinguninngua, siullermik unnugu Radioaviisip kinguninngua.

Qeqertaaqqani unammiuaarnerni inernerit aamma ugguuna alakkarneqarsinnaapput:

www.resultsshetland2005.com