Qavaat suliffissaaleqisut ikiliartorput
Siorna septemberimi Kommune Kujallermi suliffissaaleqisut 485-upput ukiorlu ataaseq qaangiuttoq 385-inut ikilipput. Nanortalimmi suliffissaaleqisut ikiliartornerupput. Tassani suliffissaaleqisut 2011-mi 140-uusinnarlutik ukiormanna 57-nut ikileriarput. Narsami Qaqortumilu suliffissaaleqisut aamma ikileriarsimapput.
- Ukiut huntritilikkaat siuliini saarulliit, raajat savallu isumalluutaanerupput. Saarulliillu kingornalu raajat tammakarmata kujataani ajornartorsiulivikkaluarpugut. Taamaasimmat paasivarput inuussutissarsiutip ataasiinnaavallaartup isumalluutiginissaa attanneqarsinnaanngitsoq tamannalu allanngortinniarlugu ilungersorsimavugut. Maanna iluatsippoq tamannalu pissutaalluni suliffissaaleqisut ikiliartorluarput, Kommune Kujallermi Inuussutissarsiornermut suliffeqarnermullu ataatsimiititaliap siulittaasua Kalistat Lund oqarpoq.
Kommunip siunnerfeqartumik suliffissaaleqisunik ikilisaaniarnera iluatsittoq kisitsisit takutippaat. Suliffeqartut ilinniartullu amerlipput.
- Kultisiorfimmit ilisimatinneqarpugut sulisut amerlanerusut pisariaqartinneqartut tassanilu aamma ilisimatinneqarput aatsitassarsiornermi tuluit oqaasii atorneqartartut pisariaqartinneqartut. Taamaammat Sisimiuni Oqaatsinik Pikkorissarfik suleqatigalugu pikkorissaanerit ingerlanneqarput maannalu aatsitassarsiorfimmi sulisut quliniit 59-nut amerlisimapput. Aamma neriuutigaarput inuussutissarsiummi tassani maani innuttaasut ukiuni aggersuni suliffissaqarsinnaajumaartut. Kisianni ilimananngilaq Killavaat alannguanni aatsitassarsiornerup ukiut pingasut ingerlaneranni aallartissinnaanissaa, tassanilu ilinniarluarsimasut sulisussatut neqeroorutigisinnaasariaqarpagut, Kalistat Lund KNR.gl-mut oqarpoq.
Kommuneqarfimmi tassani aamma sanaartugassat annertuut aallartinneqangajalerput. Uumasunik toqoraavik, utoqqaat illuat atuarfillu assersuutitut taaneqarsinnaapput. Sanaartornermik suliallit tamanna iluaqutigissavaat taamalu Kommune Kujallermi najugallit amerlanerit imminnut pilersorsinnaalissallutik.
- Kommuunitsinni suliniutit siamasissumik aallartipput tassanilu sanaartortut aamma inuussutissalerinermik suliallit suliassaqarnissaat qulakkeerneqassaaq. Savat, nersussuit umimmaallu neqaat pitsaasut nunatsinni nammineq pilersornerput nukittorsassavaat aammalu qanittumi kommuunitsinni illoqarfiit tamarmik Kalaaliaraat nutarterneqassapput. Aamma puigorneqassanngilaq takornariaqarnermut suliniutit annertusarneqarnerat, Kalistat Lund oqarpoq assullu kommunimi sulisut nersualaarpai suliffissaaleqisut ikilisarneranni sulilluarsimammata.
