Qatserisartut tusaaniarneqalerput

Suliumajunnaartoqassappalli immikkut ittumik annikillisamik upalugaarsimasoqarnissaa qatserisartut neriorsuutigaat, qatserisartut peqatigiiffiata siulittaasua, Poul Olsen tusagassiutinut nalunaarummini taama allappoq.

Qatserisartulli isumaqatigiinniaqatiginissaat Namminersorlutik Oqartussanit ualeq manna nalunaarutigineqarpoq.

- Neriuppunga suliumajunnaartoqarnissaa pinngitsoortinniarlugu qatserisartut uagutsinnut saaffiginnikkumaartut, taamaalilluta oqaloqatigiinnerit pitsaasut aallartissinnaaniassagatsigit, tassami suliumajunnaarneq kikkunnulluunniit iluaqutaanavianngitsoq isumaqaratta.

Aningaasaqarnermut Sulisoqarnermullu Aqutsisoqarfimmi isumaqatigiissitsiniartartoq, Rasmus Sembach Olsen taama oqarpoq.

Kalaallit Nunaanni Qatserisartut Peqatigiiffiata nalunaarutigaat, Namminersorlutik Oqartussanut 2009-mili isumaqatigiinniarnissamik noqqaasimagaluaramik. Maannalu tamassuma iluatsilernera Qatserisartut Peqatigiiffianni siulittaasup, Poul Olsenip nuannaartigaa.

- Soorunami nuannaarutigaarput taamatut mattusseqqajuariarlutik aatsaat sioorasaarileratta qisuariarlutik ammaassinerinut. Tamanna qutsatigalugu ornissavagut oqaloqatigiinnerit aallartinniassammata, Poul Olsen oqarpoq.

Isumaqatigiinniarnermi sulisitsisut, tassaasut KANUKOKA amma Namminersorlutik Oqartussat Qatserisartut Peqatigiiffiat illuatungeralugu isumaqatigiinniassapput.

Namminersorlutik Oqartussat isumaqatigiinniarnissamut piareersimasut isumaqatigiinniarnermut pisortap, Rasmus Sembach Olsen-ip oqaatigeqqippaa.

- Aaqqiissutaasinnaasumik tamanullu iluaqutaasumik oqaloqatigiinnissat uagut kissaatigaarput, taamaattumik qatserisartut qisuariarnissaat utaqqiinnarpagut oqaloqatgiinnissat taamaasilluta aallartissinnaassagatsigit.

Aningaasaqarnermut Sulisoqarnermullu Aqutsisoqarfimmi isumaqatigiinniarnermut pisortaq, Rasmus Sembach Olsen taama oqarpoq.

Kalaallit Nunaanni Qatserisartut Peqatigiiffianni ilaasortat ilaasortaanngitsullu 852-iusut akissarsiamikkut aaqqiivigineqarnissaat tassa maanna isumalluarnarsisutut oqaatigineqarsinnaalerunarpoq.