Qatserisartut taamaallat ikiueqqaarsinnaapput

Qatserisartut ullumikkut qatserisartuinnaanngillat. Aamma ikuallattoqartillugu, qaartoortoqartillugu allatulluunniit ajunaartoqartillugu annaassiniartartuupput.

Taamaammat annaassiniarnissamut upalungaarsimanissaq pillugu inatsit nutarterneqartussanngorpoq. Kisianni Qatserisartut Peqatigiiffiata siulittaasuata, Poul Olsenip, kissaatigaa, inatsimmi siunniunneqartut aamma atukkanik pitsanngorsaanermik malitseqassasut.

- Qaanaami qatserussuit ukiukkut aallarsinnaanngillat, issippallaartumi qerisarnertik pissutigalugu. Taamaammat isumaqarpunga Naalakkersuisut tamakkuninnga nakkutiginninnerat sakkortunerusariaqartut. Kalaallit Nunaanni Qatserisartut Peqatigiiffiata siulittaasua Poul Olsen oqarpoq.

Kalaallit Nunaanni annaassiniarnissamut upalungaarsimaneq pillugu inatsisissatut siunnersuut malittarisassanik nutarterinermik imaqarpoq.

Inatsimmi maanna atuuttumi qatserisartut qatserisartuupput, ulluinnarnili aamma annaassiniarnissamut upalungaarsimasuullutik. Tassalu inatsisissami annaassiniarnerni suliassat ilanngunneqarput.

Poul Olsenip oqarnera naapertorlugu, annaassiniarnermi atortut nakkutigineqarnerat naammaginarsimanngilaq. Tamatuma saniatigut aamma qatserisartut, siunissami annaassiniarnermut atatillugu suliarilerumaagassaminnut pitsaanerusumik ilinniartinneqarnissaat ujartorpaa.

- Inuiaqatigiinni nalinginnaaasumik ilinniarneqartartoq ilinniagatuaraarput, tassalu ikiueqqaarnermut tunngaviusimik pikkorissarneq. Uagut peqatigiiffitsinniit illersorsinaangilarput, qatserisartut ikiueqqaarnermut taama ilinniagakitsigalutik ikiuiartortarnissaat. Taamaattumik annaassiniarnerup ikiueqqaarnerullu tungaatigut ilinniartitaanerput qaffassarneqartariaqarpoq, Poul Olsen oqarpoq.

Nakkutilliinissaq annaassiniarnermilu sulisunik ilinniartitsinissaq inatsisissatut siunnersuummi ilaavoq.

Tassalu oqaatigineqareersutut, inatsimmik nutarterineruvoq, aammalu annaassiniarneq tamakkiinerusumik eqqarsaatigalugu malittarisassanik atuutereertunik inatsisinngortitsinerulluni.

Assersuutigalugu Nuna tamakkerlugu upalungaarsimanermut ataatsimiititaliaq, kommunit killeqarfii akimorlugit upalungaarsimanermik suliaqartoq, inatsimmi allassimalissaaq. Nutaatulli kommunit nutaat sisamat upalungaarsimanermut pisortamik toqqaassapput. Taakkua kommuninik iluarsaaqqinnerup siorna qatserisartut pisortaattut taaguuteqarput.

Poul Olsen isumaqarpoq, nuna tamakkerlugu upalungaarsimanermut ataatsimiititaliami qaffasissumik atorfillit amerlavallaartut. Kissaatigaalu, qatserisartut nalinginnaasut ataatsimiititaliami sinniisoqassasut.

Inatsissatut siunnersuut aqagu marlunngornermi siullermeerlugu suliarineqassasoq naatsorsuutigineqarpoq.